Day 14 - 24 apr 2009

開始有心情有時間有精神去做紀錄的一天

其實我好想將我同Midby的一點一滴記低, 但心情唔好, 又唔夠時間休息, 成日都好緊張, 驚唔知打打下blog 做做下野幾時佢會醒...搞到成日同時間比賽。今日帶Midby第二次去左健康院見姑娘, 講有關母乳既問題, 好好彩又比我遇到個超好既姑娘, 仲到我好釋重負。

話說我因為用母乳呢個問題而搞到自己好唔開心。由出院既第二日開始, 我就feel到胸好痛, 有好多粒粒野, 當日係陪月上班既日子, 佢知道我咁, 就同我去按 --- 好痛, 好痛, 好痛。

谷奶唔係太痛, 我知好多人會痛到喊。相比其他人, 我估我已經唔係好厲害。不過陪月話唔按佢, 通番d 乳線會好易有乳線炎, 我聽到好驚, o個日用盡方法去通左佢。

呢一日既下午, 我精神好差, 但要同Midby仔第一次去健康院。我唔想去, 但健康院話最好我都去, 因為問好多有關bb出世既問題。我當時仲係好weak, 又驚出街吹到風, 又驚乜野物野, 去到見姑娘, 又係一個好好既姑娘, 忍唔住喊左出來。佢問左d routine問題之後, 問我一句而家既心情係點樣, 我話好驚, 驚埋身比bb 食人奶, 因為好谷, 未ready 住, 同埋我冇信心, 驚餵唔到時, 佢勁喊我唔識handle。我希望大家比d 時間我去面對。

我生完bb之後都唔係好敢喊, 因為坐月喊對眼好唔好, 所以忍到我就唔想喊, 但見到姑娘, 佢問我呢d 問題時, 我真係忍唔到...同姑娘傾左好耐, 結果Midby爸入來睇下我, 比佢見到我喊, 我趕左佢出去, 我唔想比佢知, 姑娘都問我係唔係唔想比屋企人知, 我既心情係: 我已經係全世界最幸福既人, 我有好多好多人鍚, 陪月話我真係好好命: 生bb生得快, 又唔痛, 亞媽奶奶又鍚我, 又請到好好既工人, 咩野都係好既...就係咁, 點解我仲咁"乍", 咩都做唔來, 連埋身比BB食奶我都唔敢去面對。

我成日諗起Baillie, 同埋好多已經生左bb既朋友, 點解佢地冇咁多人幫手, 佢地都可以捱過? 面對自己身體上既變化: 行步路都唔可以急, 傷口又要就住就住, bb喊我唔識點comfort佢, 換片, 餵奶, 咩野都去學, 我真係好"乍"。

平時既我, 都叫做d 咩都有planning。我竟然對住o係我肚內10個月既Midby 冇哂辦法。從前去library, bookshop 我見到有關pregnancy既書我都會睇, 反而見到育兒既書我就諗都唔諗好快飛走, 因為心底內我覺得我可以遲d, 等Midby出世之後先可以學。

可能我個人就係咁, 唔係自己控制範圍內既野, 會好冇信心。我開始後悔點解我唔早d 去學育兒既野。

Pregnancy既種種問題, 我都好有信心去面對, 因為我睇得多, 聽得多, 學得多；育兒呢?

出院頭o個幾日就係咁樣過: 食, 訓, 心情唔好, 有時間就去pump 奶。

去到day 10左右, 我精神都已經好番好多, 身體都已經番番去之前既水平, 我開始比Midby埋身食奶。Midby有一樣野似我, 就係佢食野好急, 好惡。feed佢慢d 都會喊。可能佢o係醫院時學左cup feeding, cup 對佢來講太易喇, 相比我用人奶去餵佢, 跟本滿足唔到佢。

我又未學過咩姿勢, 由day 9-11 我不斷去試, 總知比到佢食我就ok 喇, 我唔理我既posts 係唔係o岩, 總之佢食到就得, 但佢食食下就訓左, 又或者食唔到就喊。身邊不同既人都會叫我比多d bb埋身食啦, 咁樣先會刺激到個奶量, 又叫我要比bb吸下, 咁樣會令到我既子宮收縮, 惡露先會快d 走...

結果Midby 仔day 12 o個日12:00noon我打去健康院, 講比姑娘知我想學breastfeeding, 佢叫我2:00就去見佢...由於我心態上已經ready 去面對, 所以我好興奮咁帶左Midby同埋姐姐一齊去見姑娘。

呢個又靚又高既姑娘有小小惡, 但對我好好, 仲問我教邊一科。佢教我基本既posts, 點去breastfeed, 不過我同Midby唔係好識, 佢都教我地點用手去整d 奶出來, 同埋cup feeding。我話bb 用cup 架喇, 佢識架喇, 叫佢唔洗教。佢贊我話我好有動機去餵人奶, 好積極去學, 不過佢都講左句: 有時都要睇下bb同媽媽配唔配合。由於Midby仔食食下又訓, 唔訓既就發下脾氣, 喊下...姑娘話佢太sleepy, 唔o岩timing。所以我叫姑娘比隻杯我, 我整d 奶出來比佢食, 因為Midby為左陪我去見姑娘, 佢冇食夠奶架。姑娘見到我整d 奶出來, 問我做咩, 我話我比佢食law, 但姑娘話佢訓左喎...我話佢食架...姑娘問: 佢識用杯架? 我話係, 由醫院o個時已經用杯, 結果我當場餵左Midby食左10ml左右既奶, 姑娘都講: 長處呀! 用杯飲係佢長處呀!!!

隻藍色杯好好用, 比我而家用medela 隻杯大隻, 令到佢成個口都可以蓋哂, 我問佢可唔可以law 走, 佢話係政府野, 唔可以...唉!!

佢見到我既情況, 叫我唔洗減奶粉, 只係次次feed佢前都比佢埋身食下。但番到屋企呢一晚, 我聽佢講, 真係比Midby食多d, 但搞到左面既nipple 痛。

之後o個日我已經唔敢再比佢食, 只係pump d 奶出來, 由於個姑娘安排左我過多兩日, 即係今日去多次跟進, 我今日帶埋Midby同埋姐姐一早就去健康院。我以為自己好早到啦, 點知未夠9點已經好多人等緊, 好在我9:30am之前已經可以同Midby仔入去磅重, 佢今日重3.32kg, 比前日3.27kg重左小小咁多啦。之後出去等左一陣就可以入去見姑娘喇。今次既姑娘好好好好好, 又靚又真係心地好好, 佢就叫我先坐底, 同我傾下個情況, 我就簡單交代左呢兩日番左屋企之後pump 奶, 同埋比Midby埋身食既問題。佢同我去檢查對乳房, 由於我成9個鐘冇pump 到奶, 所以佢檢查我既乳房時已經令到佢有滴奶喇。佢話我有谷奶, 同埋有反射, 所以應該可以餵到BB。之後叫我同Midby"表演"比佢睇下...佢話我要學點抱bb, 對手應該可以用自如去控制佢既高低, 我同Midby 一齊努力左一陣, 我問姑娘係唔係我既nipple 唔夠"prominent", 令到bb 冇咁易吸, 佢話係, 仲問我係唔係好insist 埋身餵。

其實我幾出奇健康院姑娘竟然會咁問...佢地咁問, 我估我真係唔合適比bb埋身食。我答佢: 唔係, 只不過驚唔比佢埋身食, 只靠pump, 會唔夠奶, 同埋我想埋身比佢食時, 我有d 做人亞媽既感覺。講到呢度, 我又忍唔住...我身旁"自由行"既媽媽都望住我, 但我都唔理咁多, 我都盡量忍, 因為我唔可以坐月時喊...個姑娘拍下我左面膊頭, 我忍忍...佢話如果我最重要都係想比bb食得幾多得幾多人奶, 唔理咩方法, 咁不如pump出來餵佢食仲好。但我擔心唔夠奶, 佢話佢等間會同我講點樣可以做到, 佢亦話有成功例子, 就係有個會計師媽媽, 佢本身"好好奶", 但佢係全pump型奶媽, 姑娘問佢點解咁做, 佢話唔想埋身比bb食時令到佢老公少左同bb相處既時間, 而姑娘都覺得佢咁諗又o岩喎, 所以佢用呢個成功例子去鼓勵我

之後佢同我講, 會教我點樣可以谷到個奶量, 佢話跟佢咁做, 包3日即係可以谷到上去。佢叫我每次用2 mins 用暖水"full", 等個胸收到個message 知道要做奶, 令d 乳線relaxed, 之後就用手去massage 個胸, 之後就pump 5分鐘, 一面pump 完再pump 另外一面5 分鐘, 之後重覆。

佢話成個過程唔洗太耐, 唔想我太累, 所以30 分鐘就夠。

呢個姑娘真係好好...(我成日都遇到好人), 佢叫我再番去"覆診", 仲問我想唔想佢跟我個case, 我話想, 我會30 April 帶bb去做聽力測試, 不過佢30April 會放大假, 所以佢叫我29April就去搵佢, 仲唔洗我出去排隊, 一入就入去佢房tim!

因為佢既鼓勵, 令到我如釋重負, 唔再為左埋身比Midby食奶而感到有壓力, 所以心情即刻舒暢哂。

呢個姑娘仲話, 如果我pump奶既, 可以餵到兩歲tim!

由今日開始, 我會努力pump 奶, 可以做到幾多就幾多啦!

40w0d Midby 出動喇~~ (分娩篇一)

唔識驚又好值得懷念的一天 ---
送給我既女兒Midby, 等佢長大識字後睇番媽媽生佢時既一點一漓


先兆?
尋晚39w6d唔知係唔係食得太多涼野, 定係上天安排左Midby要準時來臨呢個世界, 我o係晚上去toilet時見到好小好小...好淡色既分泌, 個份量少到唔去留意根本唔會見到, 我當時心想: 係唔係呢? 又唔係好敢同人講, 怕令到人地空歡喜一場, 所以我只係密密去toilet check 下, 當然緊係冇再流更多啦..., 當然應該10點-12點呢段時間左右。

食呢d 野真係有效?
尋日下午食左綠豆沙, 第一次一個人成碗食哂, 之後整埋個白蓮鬚, 再食埋矮瓜 (我其實本身唔知矮瓜有催產作用, 係睇左外國d info 先知)。我見到丁咁多既分泌, 唔敢太開心, 心想係唔係因為食得太涼, 個子宮頂唔順呢...成晚唔係好敢訓, 係度打機, 等到兩點幾鐘又去toilet check, 好似見到有d 分泌夾住好好好好少量既紅色野...係唔係呢?

結果兩點幾去訓, 到4點40分左右去左toilet, 去完都係冇咩特別, 番到房, 下體有幾滴野明顯令我feel到佢流出, 我檢查後見到有兩滴血, 深色既, 又唔係人地所講係鮮紅既, 其實當晚我都有宮縮, 不過實在太多太多次了, 都唔知係假定真, 我都冇去計佢幾密喇, 不過唔同既係呢一晚有好好好輕微既作M感覺, 唔係去留意, 都係唔會feel 到。一見到血, 仲唔係見紅? 叫醒左Midby爸, 當時係4:50am, 同佢講之後, 佢對我笑左一笑, 我估佢心諗: 係喇掛....等到喇終於!!

我仲好傻咁問佢, 係唔係整損左下面, 所以有血呢? 打左比媽咪, 佢緊係叫我入醫院啦, 但係我睇左esdlife 既姐妹既經驗, 見紅起碼等成日先真正作動...咁點好呢? Dr Wong事先又叫我見紅都要入院, 因為見紅唔係一定代表作動, 有其他可能, 好似胎盤有事等等...如果等兩個鐘頭之後先入醫院check, 已經太遲...

準備入醫院
所以我唔太敢o係屋企等太耐, 7點幾打比Dr Wong, 佢都叫我入院, 我9點左右就到醫院喇。
我除左係有見紅之外, 真係咩都冇, 問左媽咪同sonia, kerrie, 佢地都話冇咁快, 佢地都係見紅之後好多個鐘後先會有作動, 加上我都冇咩預感覺得Midby仔就快來臨, 所以去到醫院, 個樣都唔似生得咁就去登記。

首先去到3/F, 即係產科o個層填好多張forms, 又簽名, 又答幾題問題, 又打手指摸, 之後Midby爸o係個位度等, 我就入去做基本既檢查, 要全部衫除哂, 所有頸飾呀, 咩accessories 都要除低, 著上佢地既粉紅色衫, 上床, check BP, 當時都幾高下 (我既BP), 1st 就14x, nurse叫我放鬆再check, 2nd time 好似仲高, 唔知係唔係成17x tim! 之後護士亦都同我shave 左d 陰毛, 我見到佢有個表, 列出邊個男醫生同埋女醫生要patient shave 陰毛, 邊個都shave 部份, etc。我見唔到Dr Wong既名, 唔知係唔係因為個表只係列出佢註院既醫生呢? 呢個過程比我想像中好唔同, 我以為係100%將所有毛shave 走...點知佢只係shave 陰道兩側o個d, 我仲以為好痛, 點知又唔係喎。之後就big pan 喇, 個女護士同我檢查下體, 唉...同Dr Wong根本冇得比。個女護士話Midby個頭仲係好高 (呢個時候同我講呢d 野, 想打呀!!), 但就話我子宮頸軟喇, 不過未真正開, 1 finger, 佢打電話比Dr Wong時report 呢d 野, 之後帶我去候產室, 話我揀既3人房仲未有位住, 冇所謂啦, 候產緊係去候產室架啦!!

候產室十多個小時無痛楚的等候篇
去到5人既候產室見到有一兩位媽媽o係度等, 姑娘叫我上床做1個鐘聽bb心跳, check下我有冇宮縮, 佢地話有喎....1個鐘唔易過呀, 因為o係張床上面又唔可以訓, 因為bb一郁我就要press個button, 之後1個鐘喇, 姑娘話bb心跳冇問題, 我都有宮縮, 話1x 分鐘一次, 唔係密, 不過係架喇, 係作動既宮縮, 係regular 架喇。

老實講, 如果呢隻宮縮都算, 咁我已經1-2個weeks之前開始經歷左喇喎...做完o個一個鐘既心跳機之後, 我就即刻起身行行企企坐坐喇, 我知道訓係對子宮開好冇幫助, 所以Midby爸間唔中會同我o係3/F行, 不過呢...3/F 有 d幾大o者, 慢慢行都係行得10分鐘, 我見到Midby爸都好悶喇, 佢同我又睇magazines, 又打機, 又睇TV, 佢lunch上去canteen食左個唔好食$4x 既set, 之後出左去買lunch比我食。哈哈...我真係巴閉呀, 去等生仔時, 個老公仲去九龍城, 上埋去openrice 搵d 好食既野比我充饑。媽咪叫我食飯, 唔係既會唔夠力, 所以佢就買個菜遠肉片飯我食, 我仲記得我都唔係好敢食哂, 因為驚"報假案" (未生得, 比醫院退貨), 又唔知等多幾多日先生, 到時Midby會太肥太大隻, 所以我都食剩幾啖。

之後around 一點幾兩點時, Dr Wong 已經來左, 我仲話: wa, 你咁早呀? 佢話來睇下我點, 之後同我檢查, 當時應該有2 fingers, 不過佢冇同我講, 只係用手指show左個size 比我睇, 話開到咁大, 之後佢話估我係穿左水先真係作動。佢走左之後我都係行行企企, 間唔中有姑娘會過來check 下BP, 又會檢查開到幾多, 不過幾次佢地行過來時見到我個樣都冇咩改變, 都會問我: 係唔係唔痛呀? 唔痛唔同你檢查喎! (我個心都唔知幾唔想佢同我檢查...明知都未開架啦, 如果開既, 實會痛d 架嘛) 其中有一個護士同我講叫我最好聽日先生, 唔好今日生, 因為今日係受難節, 最好聽日, 再遲幾日又唔好, 係復活節, 但我心想: ha? 有得我揀架咩? 最好係快d 生啦~

成個下午就係咁過, 都有宮縮, 不過同之前一兩個week既一樣, 都係個肚硬, 好似regular, 又好似唔regular, 都唔知係唔係, 已經習慣哂了。Time 過佢, 好似around 10 分鐘有一次, 我間唔中又會打電話番去比媽咪同埋奶奶佢地, 佢地聽起把聲似好冷靜, 不過奶奶佢地好想出來, Midby爸叫佢地唔好喇, 唔知我幾時, 醫生話一係今晚, 一係聽日, 所以出左來都係得個等字。等既過程中, 我打左電話比honey, june, kerrie, kate, cindy, 媽媽同埋奶奶。奶奶佢地好緊張, 仲話出來睇我, 但Midby爸就話我咩動靜都冇, 出來都係等, 叫佢地唔好出。我間唔中又會打比媽咪吹下水, 哈哈...去到成10點時打比媽咪, 我都係同佢講我冇咩痛, 可能遲d 先生。

候產室所見所聞
等既過程中見到有三個令我印象深刻既媽媽。一個就35w內地媽媽, 勁噁, 最後醫生即日同佢開刀law BB出來, 因為見佢太辛苦。另一個就我床邊生2nd 胎既媽媽, 佢入來時開左兩度, 之後做心跳機時個姑娘話佢既進度好好, 所以推佢入去產房, 當然既我仲係坐o係度咩都冇動靜, 都唔知幾jealous 佢咁快可以生得呀, 事後原來佢o係同我係同房, 原來佢穿水之後入院就吊催生藥, 所以咁快就入產房。

成個晚上都係等等等, 最衰係冇得上網, 唔係既時間會過得好快。間唔中我又去check下d 紅, 都唔係好似m咁既, 間唔中有d, 間唔中就停左。Midby爸又出左去買dinner喇。今次去得耐d, 番來一袋二袋, 買左兩個唔同既麵比我食, 仲有一個菜, 佢自己就麥記。
我唔係食左好多乍, 唔係唔好食, 不過我都食剩左, 比埋佢拾手尾。

穿水陣痛
去到10點半, 姑娘叫我又上床做多次心跳機喇, Midby爸陪多我一陣就要走了...我同佢講有咩事會call佢, 我同佢都估可能係第二日先會生, 之後佢走喇...我就做心跳機啦, 我仲未識驚, 仲會好八掛去睇下個report, 睇下我有冇宮縮, 有個好好既四眼姑娘過來話我有密左既宮縮, 不過力度唔及我入院時咁強喎....佢仲話唔會成晚叫醒我喇, 叫我好好休息, 有咩就call佢。

點知一路做個心跳機時, 一路開始都覺得有d 收縮既感覺, 力度好似大左, 有一兩下都會有d 痛, 但係我記得d 人話痛得幾下唔係真野, 真正開得大度數時會痛好耐, 唔會只係廿幾三十秒咁快。當時又係唔識驚喎...到11:00點, feel 到Midby郁得勁左, 我仲諗會唔會整穿d 水呢? 諗左幾下就feel 到下面d 水湧出來。我聽唔到有pot 一聲, 係冇聲既, 只係好多好暖既水流出來。仲有...好大陣味, d 味令我即時諗起Midby爸買比我食既dinner。我仲即時諗: oh...原來我地食咩, d 胎水都會變成o個隻味架!

我call 護士來, 結果call左幾聲先得個d auntie 來, 佢知道我穿水只係問我有冇戴衛生巾, 唉...搞錯呀? 我開始驚, 因為知道BB o係穿左水之後會唔知幾多個hours 內出世, 唔係好易會有感染架。
之後個好人姑娘入左來, 就話我未夠痛入去產房, 佢話叫我做完個機之後 (即係11:30pm), 再等多半個鐘, 即係12:00 佢就會入來check 下我度數夠唔夠。我呢個等候時間即刻打比Midby爸, 但係mobile 呢個時間冇電, 打左一次冇聽, SMS 佢又唔知佢收唔收到...最後個mobile auto off埋。我真係老定, 入醫院時竟然帶NDS charger都唔帶Mobile charger。我問對面床既太太借左個mobile, 打番屋企同Midby爸講, 叫佢來喇。同時同佢講RR934 好似Work喎, 但我既mobile 冇電, 冇得聽, 佢話會帶MP3 機比我。

由11:30pm等到12:00開始覺得難捱, 因為驚Midby既安全, 佢冇再郁咁多, 一穿左水我既宮縮真係又密又多左, 但係而家諗番...真係唔係咁痛喎, 我擔心既係...唔知醫院會唔會report 比Dr Wong知我穿左水呢?

好喇, 12:00喇, 好人姑娘同我check, 我好驚呀....佢之前o個次check得好痛架, 當時都係得2度, 不過今次check 已經7度喇, 好開心呀! 咁快既? 由11:00pm 穿水到12:00 由2開到7度? 佢仲話bb個頭低左好多喇 (但係我又feel唔到bb個頭有咩唔同到, 又feel唔到佢點郁喎。不過o個時開始有痛架喇, 個肚好谷好硬, 有d 頂唔住, 我問佢幾時有笑氣聞, 佢話唔可以太早聞, 因為會好暈喎... (ha? 開左7度都唔可以用笑氣呀? o係候產室等幾耐先可以入產房架?)

入產房前準備 - 無痛分娩??
冇幾耐, 前後唔夠5分鐘, 佢就比我入產房lu, 仲叫我去左toilet, 有尿就去呵清先 。o個個好好人既姑娘好識得鼓勵我, 佢叫我去產房前我問佢: 係唔係呢個時候唔可以用epidural架喇? 我唔係要用, 只不過想問下而家係唔係唔可以用架喇? (因為我知道生得時係要停藥, 等我地有痛既感覺先可以去用力生。) 呢個四眼好人姑娘話: 緊係唔洗用啦, 慳番成萬蚊呀! 我尋日講talk先講過...。好開心呀! 我唔洗用epidural喇! 我已經可以入產房, 我仲未用笑氣呀!

我仲可以行入toilet, 我仲可以去toilet, 不過就要爭取時間, o係唔收縮時去toilet。見到衛生巾已經濕透喇, 當時我估我宮縮得幾密, 因為去toilet既時間內都已經縮一次喇, 所以出到去時, 都唔係好行到, d auntie 見到我就話叫我坐輪椅, 但係佢又同我拾野, 一路拾佢一路話我d 野好散...喂呀, 我點知我幾時生, 我冇準備到嘛, 我又唔係好想等佢...最後我都唔係好記得喇, 好似係坐輪椅過去產房架, 個產房同候產室同一層, 勁近, 就等如A座同D座咁遠, 去到產房比我想像上冇咁驚, 佢張床唔係我之前見過o個d 手術床咁冷既, 我落左輪椅之後個auntie 就叫我自己上床, 上上下床個肚又硬喇, 痛就唔係真係好痛, 不過會有d 那住那住既感覺, 所以唔可以一氣呵成上床, 要等等, 但係見到d 護士又好似好急, 我都忍唔住話sorry, 等等, 個肚好硬呀...

入左產房後準備工作
之後上左張床, 佢地叫我點訓好 d...基本上當時因為個肚成日好快硬(陣痛), 所以好detaills既我都唔係好記得, 由於Midby爸比左佢隻手錶我用, 等我去check下自己既陣痛幾密, 但我又唔係好識得整甩佢, 兩個護士都整唔甩, 最後有個護士就話: 叫佢老公入黎啦!

另外一個o係我右面既護士就不斷去整我隻錶, 最後未等到Midby爸入到來, 佢已經成功整甩左喇。呢個時候, 左面既就幫我貼番個check bb心跳+我既宮縮既機, 張床係有熱氣架, 我事後問Midby爸feel唔feel到, 佢話冇, 但我覺得有一陣陣既暖氣o係張床度透入我身體內, 好暖好暖架, 佢叫我將兩腳分開 - 呢個動作真係好尷尬, 但o個一刻因為陣痛好密, 咩都唔係好理喇, 就分開對腳, 將件入醫院時已經著既紅色長衫整高, o係候產室o個個好好四眼護士就比左笑氣我, 叫我痛就吸, 我就以為痛o個下就吸, 之後用口呼, 所以law住吸左一陣又law開去呼。原來係吸同呼都係o係個mask內進行。我之前睇babykingdom見到d 人話笑氣好難聞, 冇野喎, 我又唔覺得有咩特別, 只係個mask有d 膠味。你問我笑氣有冇作用, 我答唔到, 因為我用既時間唔夠1分鐘, 就已經feel到 "便意"。呢個時間已經唔可以再去用笑氣, 護士law走我既笑氣, 我仲問佢點解我唔可以用, 佢話要生喇, 如果唔係唔知痛就出唔到力, 我知我已經進入最後一個階段喇~

分娩時會有"便意"?
"便意" 呢兩個字聽落好肉酸, 但真係冇任何詞語比"便意"更貼切。 我就同我左面既護士講, 我好想"呵"。我問佢可唔可以呵, 佢話緊係唔得啦, 呵爆你呀! 唔係呀? 我真係好想"呵", 我知道有"便意" 代表Midby快出世喇, 我問佢唔可以呵咁點? 佢叫我忍! 點忍呀? 佢又唔教我點忍?

好在佢即刻再check我開既度數, 其實每一次check都比之前一次easy, 因為已經開得大左, 唔覺得佢地既手o係內面整到我好痛, 佢check完之後就話: "hey, 拾仔啦!"。

Midby出世篇(一) --- 用力生之前既準備時間
我知道我已經可以去生Midby喇。Dr Wong仲未到, 不過我問左面護士, 我可唔可以去"呵"呀, 佢話"呵啦, 呵啦"。佢叫我將d 力去哂個肚度, 一痛就去呵, 過左一陣Midby爸就入來, 同想像一樣, 佢要戴個纖維帽, 著左纖維衫外面, 我仲有閒情逸緻去睇佢裡面係唔係著叮噹衫, 係呀...Midby爸番左屋企都係換第二件叮噹衫呀! 唔知點解, 我總係覺得亞女出世時, Midby爸會著叮噹衫。Midby爸話佢之前祈左禱, 仲話會之後同我講番佢講左d 咩野, 仲話係註定我o係法國呢間醫院生bb。不過當時已經宮縮好密喇, 而家recall番都唔係好recall到佢講過咩野。(Midby爸, 你記得既, 你幫下打番o係度啦!!)

Midby爸入到來企o係我左面, 佢同其他護士一齊同我打氣。雖然我覺得d 護士唔係好友善, 但係呢個時候佢地一齊同我加油同打氣, 幫到我好多。由於Dr Wong仲未到, 我好懷疑我可唔可以未o係佢來到之前用力, 我仲好傻咁諗, 如果我已經生左, 之後佢先來, 會唔會仲收我接生費呢? 我呢個人o係呢d 時候仲會諗埋呢d 無聊野, 冇幾耐Dr Wong就到了, 佢話亞女都識揀日子, 揀假期去出世。可能Midby爸o個時都緊張啦, 佢見到Dr Wong就叫佢一聲"黃生"。哈哈, 我聽到架! 之後佢都知自己叫錯, 好似叫番聲Dr Wong。佢開始坐埋位時, 就問護士: 佢有冇打針呀 (epidural)? 護士示意冇啦, 佢就話: 好野喎! (好開心, Dr Wong讚我喎!) 因為我產檢時同佢講過, 我會用epidural, 不過頂得到就唔用。

我聽到佢之後同d 護士傾幾句, 類似係驚佢趕唔到來, 佢仲話一聽到我穿水已經起身ready喇, 因為佢知我好快就會生架喇。佢入來之後好冷靜地, 同我消毒下體, 佢用d 黃色既暖水夾埋好多棉花由我既陰毛開始倒去下面, 令到整個有陰毛既地方, 同埋陰部都消好毒。佢又放d 膠袋物體o係我兩隻腳度, 所以生bb既過程, 我對腳係不見天日既。之後就開始比我用力喇, 我前面係Dr Wong, 左右兩面有護士, 加埋左面仲有Midby爸, 好多人叫我點用力。最初我谷哂d 力o係面上, 護士話我錯哂, 叫我谷去肚度, 我仲以為自己好快就會生到tim, 因為最初幾下我真係幾大力架! 我估開始時已經12點幾喇, 我一子宮收縮就用力, 佢地話會知我幾時收縮, 只我只係o係痛時用力就可以。咁多個人同我講野, 我最聽得入耳既緊係我最信任既Dr Wong, 佢提我幾樣野: 1) 要用力時長d再長d, 2) 用完力之後抖氣唔好抖咁大口, 如果唔係, bb會入番去。o係每次用力時d 護士都話呢下做得好喇...呢下又點樣點樣, Midby爸又會話做得好呀...o岩喇..... 其實我當時好懷疑架! 係唔係真呀? 定係標準產房對白呀?

Midby出世篇(二) -- 真正用力生Midby
唔理咁多, 佢地既鼓勵說話係真係假我都唔理喇, 護士叫我再大力d, 叫左幾聲, 我發現原來我真係未出哂力架! 右面護士叫Midby爸用隻手托住我背部, 唔知係為左令我舒服d 定係令我易d 出力。有幾下右面既護士都托住我隻右腳, 等我可以出儘力, 我覺得佢咁做有用, 不過佢唔係下下都有幫我托住隻腳, 佢亦都叫我由本身扶住較前既扶手, 變成扶住較後 (近住醫生位) 既扶手。總之整個過程就係重覆又重覆, o係陣痛來時, 亦即係個肚硬時, 出儘全身既力。間唔中我仲 feel到床既熱氣谷上去我頸度, 好舒服, 但我既汗亦流好多, Midby爸又同我摸汗, 我合埋對眼又打開對眼, 成個過程都係咁。Midby爸問護士我既陣痛幾密一次, 護士冇正式答到, 只係話好密架喇。我都知啦....洗鬼你講! 我估真係唔估1分鐘就有1次陣痛。

我真正出哂力幾下Midby仔就出世。我仲記得真係出力時我刻意諗起Midby, 個心裡叫住Midby個名...真係幾次乍, 就生左Midby出來。

Midby出世篇(三) -- 剪會陰, 用工具協助生產?
o係產程接受尾聲, 即係Midby仔出世前唔知幾多分鐘, Dr Wong同我打左兩支止痛針, 佢話要剪小小會陰, 我知道呢個係必要做既, 只要佢打左針既, 我唔理咁多啦, 都唔洗擔心會好痛。我feel到佢有打針, 但係佢有冇剪到真係feel唔到。從前好多人都話剪都唔會覺得痛, 因為陣痛會好厲害, 會蓋過一切。但我既陣痛又唔係大眾所形容咁痛, 但點解我都feel唔到剪我既會陰呢? 當時有幾下我仲去feel下剪左未, 同時Dr Wong亦問我係唔係好累, 佢見到我好累, 佢話如果我冇力, 佢就搵野幫我, 佢意思即係指用vacumn suck BB出來, 佢之前都提過, 就係如果BB係poterior baby, 即係面向我肚, 就要用instrument 幫架喇, 我個Midby仔o係最後幾次check up 都係posterior position, 不過o係生既過程裡我都唔理佢有冇轉到身喇。當Dr Wong 問完我之後我仲問番佢, 有咩唔好處如果用左野幫...佢話bb個頭可能有部份短暫性會腫 (我唔係好記得個佢點形容, 因為我知道Midby爸會幫我聽), 但我都冇答Dr Wong 我洗唔洗用野去幫, 我只係每次有陣痛時就出盡力, 冇幾耐, 唔知邊一下, 真係唔知邊一下, 因為下下我都用力, Midby仔個頭就已經出左喇。由於之前所謂出盡力其實都唔夠既, 所以當Dr Wong同埋護士提我要用力再長d時, 我就諗住Midby, 心裡叫住佢個名, 之後聽到護士講左幾句野, 又叫: 望鐘望鐘, 之後有人報時, 我都唔知咩事, 原來Midby仔個頭已經出左來喇。哈哈, 好似d 電影橋段咁。之後我仲係發緊夢, 因為用力去生o個下同Midby仔個頭已經出左來既感覺係混雜一齊, 根本唔會feel到個頭已經出左, 反而因為佢地講, 我刻意去感受時, 我就feel到連佢既身體都出埋來呢一下。正如其他人所講, 個頭出左, 個身就好易出埋來。好奇怪, Midby成個人仔出哂來之後, 我冇哂陣痛了。Midby爸就好開心同我講: 你真係可以natural birth呀! 護士好快好快就將Midby仔放o係我肚上, 我見到Midby時o係我個身上, 真係唔識反應, 只係見到有舊白白地色既野o係我身上, 當時既Midby係冇喊架, 佢望住佢爸爸, 我見到佢望住佢爸爸, 我覺得好感動, 不過Midby爸唔係好識得反應, 佢都冇同Midby講咩野, 反而我就不斷叫住Midby個名: Midby...Midby...我係媽媽呀! 我係媽媽呀! 呢句說話係由Midby 係我肚內, 每晚我都會講幾次, 我希望佢來到呢個世界上好快就認得我把聲。

Midby出世篇(四) -- 剪臍帶, 抽臍帶血
想順產係我好堅持既一個決定, 我明白順唔順到產唔到我話事, 我感恩既係: 神比左最好既我。我唔係一個好乖, 好識去侍奉主既人, 但係我同Midby爸都好好彩, 有神既x顧。Midby爸亦好知道我既心願, 所以Midby仔一出世之後Midby爸就即刻同我講: 你可以natural birth呀!

我即刻都同左Dr Wong講多謝, 不過佢好忙呀, 佢要幫Midby抽臍帶血, law出埋個胎盤, 之後又要聯針呀, 所以我唔係好聽到佢有應我。我見到姑娘將Midby放o係我右面既床仔度, 應該係同佢做d 基本既清潔, 好似抽左d 鼻同口既分泌, 我都有見佢law起把較剪, 但我睇唔清楚佢係唔係同佢剪臍帶喇。事前Midby爸同我冇request 要剪臍帶, Midby爸亦講過佢唔想影video, 因為佢想親身投入咁去experience 呢d 咁珍貴既片段。Midby爸不斷o係我身邊同我講野, 佢話Midby仔幾大聲喊得, 又話Midby仔點樣點樣...當然我已經一d 都唔覺得痛, 肚亦唔覺得硬, 但係好累, 所以唔係好記得所有野。接住就係護士將Midby放o係我身邊, 同我影相, 我既眼鏡o係分娩時比佢地law開, 所以我叫Midby爸比番我, 等我先睇到Midby仔。我問Midby爸law眼鏡時, 佢仲話: 係喎!! 戴番眼鏡之後, 我就同Midby影左幾張相, 護士問Midby爸有冇相機, Midby爸話有, 不過o係出面, 不過最後佢都用手機影。

我地一家三口就影左張合照, 就如我之前見Baillie, Choi 仔同烜烜既相一樣。我仲識得擔心個樣唔靚, 第時張相點比人睇...你話我生仔都生得分心個人。當時既Midby係合埋雙眼, 比白色既被緊緊包住, 放左o係我左面, 而Midby爸就係o係Midby既左面, 即係我地兩個夾住Midby仔。我當時見到既Midby仔, 同我o係4D 見到佢既, 真係好似, 唔怪之得d 人話4D 同出世個樣好似啦...其實我覺得Midby好肉酸架, 係就係我生出來, 但係問心, 佢出世o個刻比我見到既樣, 真係幾肉酸。當時睇佢似老爺個樣, 哈哈...堂堂女仔來架嘛, 點解似爺爺架?

Midby出世篇(五) -- 聯針
o係護士同我地影相時, 我相信Dr Wong 同緊我抽緊臍帶血, 我下體完全feel 唔到有任何感覺。影完相後, Midby仔就由護士抱走, Midby爸亦o係呢個時候同我分開一段時間喇~~事後我先知道佢跟左Midby同護士出去再影多幾張相。走之前, Dr Wong同姑娘講: 抽唔到就抽bb 啦! 唔知係唔係指抽d 血去化驗或是抽臍帶血呢? 事後Midby爸見到Dr Wong, 佢去恭喜Midby爸, 同佢講唔係抽到好多臍帶血...Midby爸講番比我知時, 我幾失望架, 因為我對我既胎盤同埋臍帶好有信心, 我覺得我身體keep 得咁健康去生Midby, 佢既臍帶血應該都會好多架嘛 (不過我唔知兩者有冇直接關係)。o係Midby, Midby爸同埋護士都出左去時, 剩番我同Dr Wong, 我記得佢叫護士開d 音樂, 但最後我都聽唔到有咩音樂囉。o個位o係候產室好好既四眼姑娘過左來睇我, 仲捉住我隻手 (肉麻d 講...真係好窩心架, 有個人o係呢個時間捉住自己) 話我好叻, 仲話之前幫我檢查時其實係幫左我一把, 類似係整個頭仔落d 定點樣點樣。

之後Dr Wong應該同我開始聯針喇。我feel唔到佢聯針, 只係見到佢拉左條好長既線時, 我先知佢聯緊。當時既我真係唔識驚, 仲好冷靜, 仲識得同Dr Wong傾計, 我仲問佢cancel 個trip 咁d 錢點好, 佢話佢唔係join package, 仲買左保險, 所以佢都claim到好多錢。我又問佢點解唔去台灣呀, 日本, 佢話已經去過好多次台灣喇....其實我知Dr Wong擔心我驚佢同我聯針, 所以都刻意同我chit-chat, 其實我唔驚架...已經生左Midby, 聯針一d 都唔痛, 只係有一兩下佢整到我pat pat 有d 位, 我細細聲叫左聲, 佢問我: 痛呀? 其實個感覺好輕微, 可能o個度d 麻醉藥冇cover 到啦。佢仲叫護士law d 笑氣比我問, 哈哈, 我話唔洗...其實男醫生真係有呢樣野好, 佢比女性細心好多。個個護士同我檢查時搞到我勁痛, 只有Dr Wong 先唔會搞到我痛。不過佢聯針聯到pat pat 度, 我懷疑個傷口都應該幾大, 好在當時唔痛乍!

Midby出世篇(六) -- 產房休息
Dr Wong 搞埋d 手尾之後, 佢就出左去, 我聽到d 姑娘同Dr Wong 講笑, 問佢好多次幾時請姑娘呀, 請時要請佢地, 講左好多聲, 好開心, 好多歡笑聲。我心裡就八八掛掛諗喇: 係唔係Dr Wong出好高人工呢? 還是Dr Wong 有料, d 姑娘想跟佢呢? 我呢個時候仲有精神去諗呢d 八掛野, 哈哈...

當所有人出哂去時, 得番我一個o係產房, 個心情開始識得興奮喇。我望住牆上既十字架, 好由衷講左幾次: 感謝主!!! 我又同我既子宮姐姐講句多謝, 令我咁快咁易生左Midby, 總之我就好開心講左好多次多謝!!!

一個人o係產房既時間好難過, 覺得特別漫長, 因為知道Midby爸一個人o係出面等, 好想快d 見佢, 個心情又興奮, 又訓唔到, 只係好想快d過一個鐘。我成日都望下出面, 睇下d aunties呀, 姑娘會唔會經過, 快d 比我出去, 過左應該有一個鐘喇, 有兩個姑娘來睇我, 佢地問我有冇按個肚 (根本冇人叫我咁做!!!), 我話冇, 之後右面個姑娘就同我按, 一按就按到我好痛好痛, 仲令我下體流左好多好多野出來, 好驚!!!! 佢地兩個四隻手一齊同我按個肚, 壓落去好痛, 痛到我捉住佢隻手。起初我同佢地講對唔住, 因為太痛, 我忍唔到, 右面個姑娘反而話: 我唔好意思先係。但係之後佢不斷同我按, 我都捉住佢, 又好大反應, 搞到佢好唔高興, 仲話我: 可唔可以唔好咁大反應?

講真, 呢短短十分鐘令到我之後幾日都好有陰影, 唔敢去按個肚 (姑娘叫我記住去按肚, 令子宮內既惡露排出)。佢地按時我知道下體流左好多好多野, 左手面既姑娘問右手面既好唔好比我滴咩咩咩, 右面既就話都好, 之後就出左去打電話比Dr Wong, 話亞李xx 咩咩咩咩...好唔好用咩咩咩...之後就law左支野出來, 插入o係我右手度一早整好既針, 話因為我冇按到個肚, 仲有好多血o係入面, 我流既血比普通人多, 所以同我滴d 野, 令到個子宮收縮。

姑娘走左就有個auntie 入來同我番病房喇。等左咁耐, 終於可以見Midby爸了。走之前姑娘同auntie 佢地計我用左幾多pads, 佢地話10巾2針 (我估係用來計數), auntie 話冇喇, 用哂d 衛生巾啦, 用哂啦, 叫老公買喇, etc。呢個時候同我講呢d 野, 邊入到腦架!

我訓o係床度, 由auntie 推我去病房...佢地唔會由d 大街大巷過既, 會由d 自動門o個度出入, 入到去病房我既床度時, 已經係黑麻麻喇, 我左右兩面既產婦都已經訓左覺喇。我一路滴o個支野, 一路間唔中feel到下體流好多野出來, 其實都幾驚....咁大個女都冇見過咁多血。

好快見到Midby爸喇。事後佢講比我知, 原來一直o係出面等我, 見到我比人推入來, 先跟住入去病房。to be continued

39w6d 柳暗花明又一村

仲未生得的一天

今朝10:00am 收到個phone call, 好開心呀!!由於我promise 唔可以同人講, 所以我都係唔打出來喇。

收到個好news 之後醒左, 好好心情想食好多野, 不過都係驚Midby吸得太多, 所以都控制一下。

signs 又係冇咩, 只係5點鍾去toilet番到房, 唔係好訓到, 可能緊張啦, 亦有可能係因為Midby大隻既關係, 我打側時feel到佢裡面郁, 令到我內面痛, 唉...我都擔心自己BP高, 尋晚同今朝Midby爸同我check時都話高左小小, 唔知係Midby既關係, 定係因為我跌左一跌, 所以個心情受到影響呢?

我知媽咪實出來陪我, 我呢個大小姐真係巴閉, 爸爸, 姐姑, 媽咪3個人出來陪我, 唉, 我好唔好意思呀, 佢地3:00pm出來, 之後stay 到5:10pm 就去MK market 行, 我之前就走去左訓左一陣, 而家都唔理喇, 冇野做去訓, 我明知係對子宮開係冇好處, 但我根本睇唔到, 估唔到我子宮幾時會function, 會去作動, 叫我o係度等, 冇野做, 心情差仲衰。

不過醒左之後好難去訓番, 因為打側身時Midby成個人仔既重量令到我唔舒服, 呢種感覺之前冇架, 係呢幾日先有, 我估佢真係太大隻喇。

我早上心情好完之後到下午又開始煩...唉, 都唔知係唔係最後要induced labour 佢先出來, 係既, 幾時呢? 係既...咪好對佢唔住, 又話等佢自動出來, 最後又要induction, 好多好多野去諗。點樣先係最natural呢?

我既BP呢? 我身體仲係唔係可以應付呢? 如果真係用induction, 幾時最好呢? 用時會好痛架喎, 咪一定用epidural? 我仲同自己講, 頂到真係唔想用, 一來錢, 二來真係唔想有咩risk, 但用induced labour, 我覺得一定會痛, 所以我覺得用epidural既chance 會好大, 唉, 又要多洗唔知幾多錢....錢, 又係令到我會覺得煩既一樣野。

Midby: 媽媽一直只係希望你身體健健康康, 我冇求過你呀, 係唔係, 但係媽媽真係今次好認真同你講, 如果你唔自動出來, Dr Wong會用方法整到你出來, 到時唔係你同媽媽既意願, 咪仲衰? 你話比媽媽知啦, 點解你仲唔出來呀? 媽媽係唔係有d 野冇做到, 令到你出唔到來呀? 定係仲有咩原因呀? 你已經係一個集萬千寵愛在一身既bb, 你出左來之後個個都會好錫你, 去照顧你架, 媽媽肚子唔名位比你長大, 你遲早都要出來, 你多一日o係媽媽肚子內, 對媽媽既身體都有一定既影響...總之媽媽唔想催你出來, 你乖啦!!

39w5d 跌倒!

PK的一天

我真的PK, 唔係假PK。不過我冇事, 感謝主既係...Midby仔都應該冇事。

一直我都好proud of 自己行得走得, 今日去左clubhouse 睇magazines, 奶奶出左來比d 包我食, 去左clubhouse 搵我, 同佢傾左一陣之後, 我地就走, 唔知點解...唉, 真係好似比人捉住隻腳咁, 我卜左幾下, 成個人卜左o係地, 當然個肚都有落地, 我即時諗...唔係呀...唔係要咁既情況下入醫院呀?

我好似記得腳落地先, 之後左手都係, 我自己起番身時都覺得個下巴同埋個心口痛, 我feel 唔到個肚痛, 因為個肚咁大, 痛可能係Midby仔痛, 唔係我痛。

我奶奶好驚....我唔洗佢扶, 我都起到身, 講真唔係痛, 不過好驚, 點解會跌倒呢? 點解呢?

唉...唔係迷信, 不過跌之前奶奶先話我仲咁輕型, 我話仲行得走得, etc, 點知, 我就過左一陣PK左。

我個左面肚有hit the ground, 唉, 對唔住Midby, 我當時唔係好識得驚, 番到上屋企打比Midby爸, 可能我交代得唔好, 佢get 唔到我原來係個肚有落地, 佢仲笑笑口同我傾左一陣。

我反而驚奶奶乍, 佢表面好似冇咩野, 佢一陣就走左了。

番到屋企老爺打電話比我, 問我隻手有冇事, 佢真係好好...個個好正常緊係擔心個肚多過大人, 佢就係驚我誤會, 佢只係問我隻手點, etc。

之後奶奶話佢走左之後先識得驚, 佢當時見到我係腳落地先, 不過諗唔明點解我會整到下巴...我都唔明, 所以我都開始識得驚。

打去搵Dr Wong law o個兩位醫生既details, 順便問埋佢我跌倒既事, 佢話一般咁樣既impact 應該冇問題, 如果係撞車咁大既impact 就麻煩好多了。

佢叫我擔心既可以去法國聽聽bb心跳, 之後send個report比佢睇下, 同埋佢都叫我observe 下bb既movement。

因為Midby o係事後都仲識得打hiccups, 又好似好normal一直都夜晚, 所以我就冇去左醫院了。

件事亦過左一段落。

Dr Wong所介紹比我o個兩位醫生都好專業 (從Dr Wong 口中所形容), 我之後仲上網搵呢兩位醫生既profile 睇, 唔錯唔錯, 都叫放下心頭大石了。

Dr Wong 仲話希望係由佢接生, 如果可以...等到佢番來之後先作動就好, 哈哈! 咁黑心架!!

39w4d 註定同Dr Wong 無緣

平平靜靜的一天


今日已經4月7日, 4月9日Dr Wong 就飛喇, 除非Midby今晚半夜/ 聽朝出動, 否則必定由另外一位, 同我素未謀面既醫生接生。


我以為我好易接受到, 點知尋晚發左好多夢, o係度計數仲有幾多日Dr Wong 會飛...到醒o個刻我都仲係好記得自己o係度倒數...所以我知心底裡其實我好想由Dr Wong幫我既。


既然都99%已成事實, 除非Midby今晚半夜/ 聽朝出動啦, 我只好去接受由一個同我素未謀面既醫生幫我接生...佢只係靠Dr Wong比佢既report, 而接手"搞掂"我同Midby仔。

Midby爸話我成日從-ve o個面去諗, 我都唔算呀, 我成日都好感恩, 覺得主安排比我既一切都係好好既。好似我已經好多signs 話比我知我應該會快labour 喇, 但係等等等over 1 week 都係咁樣...我會同自己講, 我身體對我好好, 佢會一步一步去令我適應, 好似成個pregnancy咁, 我都曾經有過腰痛同埋腳腫, 但係我既身體對我真係好好, 可以短短幾日就冇事, 因為我既身體已經調節左, 適應了。

話雖如此, 等既過程唔易架, 因為太多uncertainties 喇。

可能過左4月9日, 知道Dr Wong飛左喇, 我既心情會好番d喇, 因為知道已經連0.001%由佢同我接生既機會都冇埋, 不過到時又驚既係過期問題, 唉!!

Midby: 媽媽已經同左你講架喇, Dr Wong 得番聽日得閒乍, 如果你鍾意Dr Wong既, 想由佢同媽媽接生既, 你就好出動喇。如果你對佢冇信心既, 又或者身為未ready要出來呢個世界既, 咁就算啦, 媽媽會等你, 不過你記住, 你點都要同我配合, 唔可以令到媽媽開刀生你架!!

39w3d 提早一日產檢

希望Midby出世前最後一次產檢的一天

今日媽咪又出來"陪"我喇。佢出來一來law d 湯比我飲, 二來教姐姐整幾味, 三來就係比d 刺繡姐姐做, 等佢唔洗成日搵野去做。

我又做左衰女, 對媽咪發脾氣。唉...我今朝早已經黑左小小面, 我同姐姐講我心情唔好, 叫佢休息下, 唔洗搵野去做, 叫佢坐下, 佢話佢都知我唔開心, 佢都想我bb快d 出世...但我個人就係咁, 開心時可以不停講好多野；一唔開心時真係唔願見人or 同人打交道。佢好好...仲問我洗唔洗massage, 唉!

媽咪出左來之後教佢整幾味, 媽咪又講野勁快, 有好多字佢識用英文既, 但佢又唔用, 用哂中文, 姐姐緊係話ok, ok, ok, 但大家都知...佢夠膽話唔ok咩? 我好鬼嬲, 叫左媽咪10萬9千7次慢d, 用d 英文字, 佢仲係講得咁快, 結果我忍唔住, 發左脾氣了。

發脾氣之前係因為我打去Dr Wong度make appointment, 準備聽日去睇佢, 不過多口問埋姑娘佢幾時放假, 原來佢9 April - 12 April 就飛。唉...知道之後我心情即刻沉重哂 (我之前仲以為我可以睇得好開心, 冇咩所謂tim)。

可能因為咁, 借d 意就發左亞媽脾氣了。

亦都係因為知道佢好快out town, 我決定提早一日去見佢, 傾下佢out town時既"對策"。

媽咪陪埋我去見下Dr Wong, 我係最後一個appointment 7:15pm, 不過姑娘姐姐話太多人了, 叫我都係8:00pm 先去。媽咪叫我早d 出去行下, 緊係好啦...結果去左sogo啦, needs啦, 行行下Midby爸就加入, 我feel 到自己o係sogo/ needs 時既mood 係好好好好好好既.....唔知係因為見到d 野食? 定係已經出左街? 定係咩原因, 總知好過o係屋企好多倍啦。

去到Dr Wong度, 姐姐好快就同我check BP。Wa, 真係蝦我law! 13x/ 8x, 比起我o係屋企今日check 兩次都係高囉。之後姐姐再check 多次, 仲高 -- 14x/ 8x。

入到去問左Dr Wong 佢out town時點, 佢有兩個back up 既醫生會幫我, 另外我叫佢一定同o個個醫生講清楚我一定要natural birth, 佢話佢揀得做natural birth既多數都ok既, 佢都話我既子宮頸已經好ready, 第一胎就有咁, 已經好好....(希望啦!!!)

Anyway, report 完比佢知我有好多contractions + mucus discharge, 之後問埋佢咁多contractions 會唔會對bb有影響。佢話胎水夠, BB size ok 既, 就唔洗擔心。

照 ultrasound 時仍然照到Midby既面仔。佢隻衰野, 又係做左posterior baby呀! 唉! 點解咁多個月佢都anterior baby, 到最後先咁樣呢?

Dr Wong check 埋個胎盤, 話仲好靚, 冇鈣化,血流量仲好好, 即係唔洗因為呢d functions 上既問題, 而去做induction。

不過佢冇check d measurments 了, 我問佢點解, 佢話上個week 都check 過, 唔洗check 得咁密...(ha?)

不過咁都好既, 我最驚佢太大, 如果今次比我見到佢又"突飛猛進", 我又會擔心多幾錢重。

最後佢remind 我, 都係同一樣野, 就係BP 一高, 就即刻contact 佢, 就要入醫院去induce labour。

Midby仔幾比面婆婆呀, 佢今日比個正面婆婆睇呀! Dr Wong又print左3張相比我地, 哈哈! 不過我寧願佢show 唔到個樣比我地做, 做番個anterior baby 好過啦!

Midby: 你今日都聽到Dr Wong 會April 9-12 out town 架喇, 你想唔想由Dr Wong 同媽媽接生呀? 媽媽遇到Dr Wong - 一個令我同埋爸爸都咁信任既醫生一d 都唔易, 由舊年8月到今個月已經9個月喇, 你唔鍾意佢咩? 如果係唔係o係April 9之前出世, 你就會由另外一位, 一個連媽媽都未見過既醫生去接生架喇! 不過我feel 到你今晚有d 唔同左喎, 你o係媽媽d 毛毛o個度了下了下喎! 係唔係想個頭仔再低d 呀? 好呀好呀! 我等你呀!

新生兒黃疸

造成新生兒黃疸的原因包括

生理性黃疸：

足月兒在出生2-3日膽紅素達到高峰，一週後就看不到了，兩週後即降至正常值以下，而早產兒在出生後5-6日，膽紅素達到高點，兩週後消失，出生3-4週後降至正常範圍以下。

母乳與黃疸：
早發型(breast feeding jaundice)

餵母乳的嬰兒在出生4-7日時，其間接膽紅素最高(可能比非母乳哺育者還高)，因此純母乳哺育的嬰兒在出生頭幾日，攝取之水分與熱量不足，並且增加腸肝循環所致。改善之道只要增加餵母乳次數及奶量即可降低黃疸。

遲發型(breast milk jaundice)

約有1/3餵母乳之嬰兒在出生第三星期仍有黃疸，可能因母乳中某成分會抑制膽紅素的結合作用，其解決之道在於停餵母乳1-2天，即可使黃疸迅速降低，之後再重新餵食母乳；也有些新的研究報告指稱根本不須停餵母乳，只要等它慢慢下降，因為餵母乳而造成之黃疸極少變成核黃疸。

病理性黃疸：
通常出生後24小時內出現黃疸、總膽紅素每日增加超過5mg/dl、足月兒超過13mg/dl，早產兒超過15mg/dl，直接膽紅素超過1.5-2mg/dl、足月兒黃疸超過一週，早產兒黃疸超過兩週，均可視為病理性黃疸。

產生原因有：
ABO血型不合20%的母親語胎兒血型不合，其中5%具有臨床上的溶血疾病，通常發生於第一胎及O型母親而A或B型胎兒，此因少數O型母親的抗B抗體屬lgG，可通過胎盤進入胎兒體內破壞紅血球，但情況並不嚴重。

Rh血型不合Rh抗原有C、D、E、c、d、e 等，白人常見母親D(-)而胎兒D(+)，但國人常見的卻是E及c，可是一般產前檢查卻只有針對D而已，慶幸的是國人Rh不合的情形很少見。Rh陽性胎兒之紅血球在生產過程中會進入Rh陰性的母體內，刺激母體產生抗體，而當第二胎Rh陽性胎兒生產時，抗體又進由胎盤進入胎兒體內破壞紅血球造成黃疸，往往出生第一天就須作一次或以上的交換輸血治療，嚴重者更造成核黃疸或胎兒水種，而危及性命；在臨床上若有酸血症、低血糖、缺氧或膽紅素快速上升時，應提早作交換輸血治療才是。

ABO的保護作用若Rh陰性母親生下Rh陽性嬰兒，且同時又有ABO血型不合，則嬰兒之紅血球進入母體，在未能產生Rh抗體前早已被母體的抗A、抗B抗體所破壞，因此其下一胎之溶血反應也會減少許多。

其他的膽紅素產生過多之情形如：G-6-PD(即蠶豆症)、紅血球過多症、血種塊(如產瘤)、Vit.K缺乏引起之貧血、幽門狹窄等增加腸肝循環之狀況。

膽紅素排泄不良如：家族性非溶血性黃疸(Cigler-Najjar症候群)、半乳糖血症、甲狀腺機能過低症、糖尿病母親生下之嬰兒、早產兒、哺育母乳、阻塞性黃疸(如先天膽道閉鎖、總膽管囊腫等)。

膽紅素產生過多及排泄不良如：敗血症及子宮內感染。

核黃疸Kernicteru：
游離的未接合膽紅素會通過腦血管屏障(BBB)造成腦損傷，出生5-7天發生厭食、嗜睡、尖銳哭聲、無力、嘔吐、不安、甚而張力過強、角弓反張、痙巒、肺出血等，若存活下來會有神經、精神心智發育受損的現象。據統計，膽紅素超過25-30mg/dl者，有1/3造成核黃疸。

來自http://www.baby-life.com.tw/baby-mother.com.tw/baby-life/good/little-baby/good-10-2.htm

39w2d 到我未?

狂哭了的一天

今日工人姐姐放假, 唔知係唔係呢個關係, 定係因為有Midby爸o係屋企, 我起身之後心情好左, 整左個simple lunch 比佢同我食, 之後佢就玩佢既飛機, 我就上我既網, 拾下野...上上下網見到雅典娜, 問佢上胎幾時生, 知道佢個b女係過期1個星期, 仲係7lbs 幾, 結果要聯2x 針。聽左之後好驚好驚...番左入房, 諗唔開, 喊左出來。

喊既時候我同自己講, 唔比有下一次喊。我喊之前Midby仔o係度郁緊, 但當我喊得緊要時, 佢好靜...好靜, 好似feel 到我唔開心, 好似佢都知道有事發生, 唔敢亂郁。Midby爸入左房見到我咁...唉, 同我"訓話"一番。

好多野都係我自己諗唔開, 諗唔通。我好多野即時都聽唔入耳, 不過我會去消化架, 我覺得佢講得好o岩, 成個生bb既過程, 分娩只係好短一個stage, 我唔應該只係focus o係呢個stage 度。呢個stage = gambling game, 未試過唔知係唔係一定輸。Baillie 今日打比我, 同我講左句令到我有番力量既說話, 就係開唔開刀唔係關個bb size 大唔大事, 佢個表姐頭胎8.x lbs都可以順產, 但2nd 胎得4.x lbs 反而就開刀, 因為子宮頸唔開。

聽到咁, 我當然舒服一d, 唯有希望我到時作動既時間, 子宮頸會生生性性同我開哂佢, 等Midby仔由我既產道出世。

同尋日一樣, 我有好多好多分泌。d 分泌除左好似水狀之外, 仲有d 好似鼻涕咁既物體。我懷孕係因為成晚打平左訓覺, 令到佢難流出來, 所以一起身之後就流哂出來。d 分泌多到要用護墊先頂得住, 曾經都有懷疑係唔係穿水, 但又唔似, 因為好"傑"既, 不過就比尋日更加多, 只不過仲係冇紅色囉。

喊完之後我去左訓覺, 訓到6:00點就起身, 因為我知道工人就番喇...等到7:30pm Midby爸陪我行去深水步食晚飯, 行行行行到成11點我地番到屋企。樓梯我唔係行得多, 不過行路都唔少了, 希望有幫助啦。

今晚仲食左個紅綠兩溝豆沙@松記tim! 唔知對產程有冇幫助喇! 儘下人事試下啦!

我心情而家好了...情緒既野都係一時半刻o者, 我會多d 諗下Midby仔出左世之後既開心情景, 我好想以一個開心既心情去等待分娩, 做個開心既媽媽。我絕對唔想Midby仔因為我而家既心情咁唔好, 而令到佢唔肯出來呢個世界上呀!

39w1d 係唔係Mucus plug?

限期又少左一日既一天

真係好在Midby爸今日放假, 唔係佢陪我, 我又會發癲。好"辛苦"先訓到11點起身 (真係衰格...講埋d 咁既野, 幾多人想休息耐d都唔得...), 因為冇野做既我唔洗訓咁多, 好早就醒左, 但起左身又有咩做呢? 所以又去訓喇...訓醒記得要同工人姐姐去開戶口, 整醒Midby爸一齊出門口。

平時我邊會咁積極, 只不過而家太多空閒時間, 加上又想多d exercise, 所以決心今日同工人姐姐搞掂個戶口。就係因為我已經放緊maternity leave, 點記得今日係清明節, 係bank holiday, 結果緊係bank closed啦。

算...show 左比姐姐睇點去7-11 還錢, 之後叫佢番屋企先, 同Midby爸行左二期一陣, 拍下拖, 行到兩點鐘先番屋企食lunch。

番到屋企我feel 到好濕, 好多分泌, 好開心啦...去check (呢排都勁check 架喇), 結果緊係冇料到啦。我知道approaching labour 時會多分泌, 但冇人知labour 幾時take place。不過好奇怪喎, 因為d 分泌多之餘係好似排卵期咁, 有d 拉絲, 幾"傑"下。我即刻上網check 下啦, local 既info 唔多, 不過外國就有好多, d 人稱之為mucus plug。由於pregnancy時, cervix "子宮頸" 要有mucus plug 阻住d bateria 進入cervix 內, 去保護胎兒。但一當approach labour 時, cervix 就會soften "軟化", 同埋dilate "擴張", 所以本身既mucus plug就會甩出來。呢個mucus plug可能會一甩就甩哂, 亦有可能慢慢甩。

而lost 左mucus plug 唔代表labour 即將發生, 可能up to 1 -2 weeks' time 都未定, 不過呢個係個sign 代表cervix 開始ripen。有d 情況會mucus plug 夾雜有d 血絲。

我check 到外國咁多info 都係咁講, 緊係開心啦...但諗諗下..."可能up to 1-2weeks' time 喎"! 我係邊隻呢? 同埋我發現既"mucus plug" 係唔係真係mucus plug呢?

Anyway, contractions 繼續有, 不過冇以前某一日keep 住whole day 咁密, 我食飽lunch之後, 飲多次白蓮鬚就去訓個覺 (我而家決定唔理喇, 話就話zzz 係對子宮頸開合冇幫助, 但我都未作動, 訓左先算)。

醒左之後先發現訓左個幾鐘 (唉! 訓咁多, 我夜晚點好呀?), 之後食左dinner 就去一期買野喇, 因為Midby仔既衫唔夠位裝呀 (好野! 又可以出去行喇!), 同Midby爸來回行出去行番來, 加上由41/F 行到47/F 咁多層樓梯, 都唔係太差喇!

番到屋企, 食埋個4/1既西瓜, 拿...

Midby仔: 媽媽已經飲左三次白蓬鬚喇, 食哂我買o個4定5罐含有豐富既DHA 既salmon喇, 又食左半個大西瓜, 又去埋接爸爸放工, 食埋媽媽好想食既米線喇...媽媽都叫做已經滿足哂坐月前既願望。媽媽有時懷疑, 係唔係你太有"性", 知道媽媽有呢d 心願, 所以你想等媽媽完成呢d 心願先出來呀? 我已經做哂架喇, 你夠哂DHA 架喇, 你由媽媽好似32w開始, 已經吸收好多DHA/ EPA 架喇, 出世之後媽媽都會食好多魚, 等你飲媽媽奶時都會吸收足夠既DHA/EPA架喇。媽媽前幾日都食緊yogurt, 等你經過產道時會黏到益生菌 (不過已經食哂喇, 又唔知你幾時出來, 好唔好今晚又整, 聽日又食過呢...), 媽媽又食緊好多rich in zinc既食物, 上個sat 叫麻麻整蠔我食, 我仲食左好多, 平時又食紫菜, 希望吸收多d zinc, 等子宮頸易d 擴張...我已經一切就緒, 只係等你揀個好時間出來, 你唔好太遲呀, 如果唔係Dr Wong 同媽媽接生唔到, 媽媽會好驚架喇。

39w0d 又係毫無徵兆

媽媽出左來陪我半日的一天

每到左星期五, 真係又驚又喜。以前到左星期五, 就知道Midby仔大一周, 個胎大左, 個人都定d；不過而家好似同時間比賽, 臨近預產期, 心情當然唔係好受。

媽咪緊張我, 一早打來話比湯我, 同埋較工人姐姐包餃子。

如果唔係因為佢出來, 我一定去搵Midby爸食lunch, 等我打發下d時間。

我10點起身食左個面包之後就去clubhouse度坐。其實我係避左個工人, 總知見到佢o係度我心情就唔好 (我姓賴...自己唔好mood 就去嬲人), 我law埋部notebook, 去左樓下坐, o係度慢慢睇magazine, 但個心總係唔夠relaxed。回想番對上一次去clubhouse已經係summer時我放大假, 有左Midby仔幾個星期, 當時summer 好熱, 我去clubhouse 涼下冷氣, 都唔知幾relaxed。o係度睇magazines時一路試下可唔可以上網, 但係唔知個network咩事, 算數。

之後媽咪1:30pm 就到左我屋企, 佢唔記得帶白蓮鬚同埋餃子皮, 好, 等我又有機會出街行喇。同媽咪去左大角咀街市, 買左舊豬肉、餃子皮、番茄著仔、去埋百佳買半個西瓜、幾舊豬肉、兩隻芝麻雞、生抽&老抽 etc。一去就去左個幾鐘。番到屋企，媽咪教姐姐包餃子, 之後整豉油雞 (o岩喇, 整埋呢d time-consuming既食物就好喇, 等佢唔洗成日搵野去做, o係我面前行來前去), 同埋枸杞湯。

等左咁耐終於等到Midby爸番來了。食左dinner之後, 當然我唔會放過叫Midby爸陪我既機會。我飲左白蓮鬚之後就大約10點鐘行左出去旺角, 行呀行呀, 行到Ireland's potato, 食左Midby爸想食好耐既french fries。我唔敢食太多starch, 怕Midby仔又吸哂, 結果都係Midby爸食大份, 我就淺賞囉。

呢一晚行得唔係好多, 都係行左兩個鐘左右, 但條腰硬哂, 搞到我幾咁開心, 以為又係有個signs 代表快喇快喇快生喇。我結果都同Midby爸講要坐車番屋企, 同埋唔行樓梯喇。

38w6d 出左街接Midby爸放工

仲係等緊Midby出世的一天

今日我刻意訓到好遲先起身。起身食左個即沖既麥皮就算, 上一陣網, 聽兩個電話, 分別係爸爸同媽媽打來, 都係問同一個問題...唉! 我最衰就係生成有壞脾氣, 亞媽打左兩次來, 我叫佢唔好再打電話來...我都唔係好記得佢話擔心d咩喇, 好似話聽我講Midby仔塊面對唔o岩, 佢擔心唔知咩野...

lunch之後同左工人去agent度law番佢既ID, contract, passport, etc 去埋護協買左5-6包yogurt, 之後行左一陣就同工人姐姐坐701番屋企, 而我就甩難了。我得到Midby爸既同意, 可以去接佢放工。

去接佢放工真係有幾大好處: 1) Midby爸又開心, 有我去接佢; 2) 我可以行多d, 行下樓梯, 對子宮頸開有幫助; 3) 唔洗o係屋企冇野做, 亂諗野, 時間好快過; 4) o係坐月之前行番夠皮, 止下渴都好。
我出左街之後唔洗成日對住工人, 個mood 真係好好多, 又唔洗成日諗Midby仔幾時出世。

我同Midby爸講, 心底裡好想食佢公司o個間面鋪多一次先生bb, 同埋都想食埋罐salmon, 比Midby夠哂DHA先。都唔知係唔係Midby咁有性, 想媽媽做哂呢d野先出來呢?

今晚番到屋企已經飽飽, 點知姐姐仲比左成大碗既腐竹糖水我飲。我驚甜, 甜會太長胎...(我真係好自私)。

夜晚開始又有宮縮, 11點幾時開始有d 宮縮比較強, 有小小咁多痛既唔舒服感覺, 唉...呢d false alarm 已經見怪不怪, 番房同Midby仔傾下計好過。結果我同Midby爸都同左Midby傾左一陣, 令佢明白我地諗咩。

時間一日一日過, Dr Wong 復活節要放假, 佢冇同我講係唔係有另一位醫生接手, 不過佢當然好想我快d 生啦, 佢初時比左個時間我, 就係呢個星期日, 待番3日乍...好驚, 我唔知點, 同時間比賽緊咁。

其實相差預產期仲有成1個星期, 點解我咁緊張呢? 神呀! 可唔可以讓我成熟點, 有足夠的能量和勇氣去面對困難和挑戰?

38w5d 作動vs假宮縮?

又食炸糊的一天

由尋晚去睇完Dr Wong番屋企就一直有假宮縮, 唔似得之前幾日咁, 今次係keep 住有假宮縮, 去到今日whole day 都有, 最密時會5分鐘一次, 以為佢好有規律5分鐘一次啦, 佢假宮縮到幾次之後又會疏番, 大大話話都假宮縮有超過60次, 由我7點起身count 到zzz時既11點左右。

媽咪同爸爸出左來, 因為媽咪要同我check BP, check 左3次都係normal, 都係under 120/ 80, 不過佢緊張既唔係我既BP, 而係見我勁宮縮, 佢好想我入去醫院check check。但我好清楚知道呢d 唔係真野, 真野係會getting stronger and stronger, 同埋會有痛, 但係我冇痛呀, 只係個肚硬哂。我打去法國問, 姑娘為安全起見, 當然叫我入去醫院啦, 佢既理由係因為唔知我幾頂得痛 (我話係唔痛既宮縮), 但我冇理佢。

去到6點開始, 就密到6分鐘, 5分鐘1次, 聽起來好得人驚, 但真係冇感覺架喎, 最多只係話我feel 到內面有d 野由內至外頂出去, 一陣唔夠1分鐘就冇事喇, 你叫我點入醫院呢?

呢個stage入醫院除左會考慮$之外, 最重要係我驚姑娘/ 醫生會同我催生。可能佢見到我都入左去住喇, 子宮頸又ready喇, 等咩呢, 咪同我催, 但呢樣野我好唔想, 我想Midby仔ready 先自己出來, 唔想人工對佢做住何野住。

Dr Wong曾經講過, 如果我BP高既, Midby又唔早d 出世, 就要我sunday 去入醫院催生, 我而家就好似同時間比賽咁, 好矛盾, 一方面好想Midby快d 出來, 另一方面又唔想迫佢, 想佢真係ready 時先出來...

好煩! 好多人都打電話比我, 個個都緊張我, 擔心我, 但係我都心急架! 我好想食野, 但又驚食得多, Midby吸哂, 我仲難生... 咩都唔做得。想去街, 又要搵人陪; 想搵家務做, 比工人做哂; 想煮野食, 咩都準備好; 想訓覺休息, 又驚令子宮頸難擴張; 想睇TV, 又睇唔入腦; 去打機, 打幾鋪就冇隱; 想番大埔, 又要搵埋工人番; 想行樓梯, 又係要搵人陪...

我對唔住Midby。心情唔好搞到我同佢冇野講。平時得閒就同佢傾計, 我今日都冇同佢傾咩野。夜晚我打比sonia 同kerrie, 問番佢地入醫院時宮縮既問題, Kerrie話佢塞左藥之後6個小時內都冇痛, 只係好谷既感覺, 不過就每次谷好耐。Sonia就話佢冇谷/ 肚硬feel, 只係作M 痛，佢地兩個既expereince 都唔可以比我作準。

因為whole day 谷住既關係, Midby郁少了, 我好擔心。我驚到叫Midby爸去聽佢心跳。我唔知個子宮o係度contract 時, Midby o係內面受既壓力幾大, 所以我今晚早d 去zzz, 希望打側左身, 令到佢多d 位, 同埋冇左宮縮, 會令佢舒服一d。

我會唔會好似Baillie咁呢? 佢有痛既感覺成十幾個鍾, 子宮頸都唔開, 我係唔係同佢一樣呢? 如果係, 即係我唔可以順產呢? 又還是我今日whole day 既都只係假宮縮呢? 如果係既, 咁密, 咁多既假宮縮有咩implications 呢? 係唔係我子宮malfunction? 定係好事? 比子宮practise o者?

面對呢d 情況, 根本就係個個大肚婆都會遇到既, 點解我咁低EQ呢? 我可唔可以學識+ve去面對, 開心d, 等Midby仔覺得佢來呢個世界係o岩既!

Midby: 媽媽好無用呀, 去完Dr Wong度開心一陣, 而家又擔心。你估Dr Wong 所講既野係唔係真架呢? 媽媽係唔係真係anytime會作動架喇? 係既, 你比d signals 媽媽呀!