Day 91 10 July

Midby爸在昆明的一天

番左工成個月喇! Midby 亦都越來越大個, 越懂事, 唔怪得咁多媽媽都話, 唔想錯過bb既成長, 唔捨得番工。

如果唔係親身經歷, 都唔會體會到bb 原來真係成長得好快。呢幾日為左搞99日宴而睇番Midby第一個月好多相同video, 我發覺我真係好冇用, 竟然對佢出世之後o個幾個星期冇咩印象。究竟係我記性有問題, 定係bb真係太快大呢? 好在世上有videocam 既發明, 令我可以睇番佢之前既片段, 叫做唔太過有遺憾啦!

呢個星期由於Midby爸上左昆明, 媽咪出左來陪我地。其實我覺得冇左Midby爸夜晚o係屋企唔係太大問題, 好多時都係姐姐一個搞掂, 最多係我忙小小, o係姐姐做野時我睇住Midby。不過奶奶太緊張, 佢講到明如果我媽咪唔出來陪我地, 佢會擔心到訓唔著, 加上本身媽咪都緊張, 覺得屋企冇個男人o係度唔係咁好, 所以由Midby爸上左飛機o個日開始, 媽咪就o係度訓。

雖然都有好幾年冇同媽咪一齊生活, 但係始終都係媽咪, 有佢o係屋企, 好自己個心真係定d。我有呢個媽咪又係幾生修到。有佢o係度, 我幾乎唔洗照顧Midby, 可以做自己既野。不過我又驚Midby唔認我, 所以都會抽d 時間同佢玩。

番左工之後真係覺得少左好多時間陪Midby。番到屋企早既就6點, 之後好彩既, 時間就到就餵Midby, 之後又食晚飯喇, 食完又去沖涼之後又去pump 奶喇。話咁快又10點, Midby 呢個時間又要食奶, 多數呢餐由我餵, 但餵完同佢玩一陣都已經10點幾11點。之後姐姐就會um佢訓, 而我就上下網一陣又到12點喇。訓得一陣又夠4個幾鐘又pump 奶<---日日既生活就係咁喇。所以做一個working mother 一d 都唔易, 我已經好好彩, 有工人同屋企人幫, 都仲覺得辛苦, 請問邊度有d EQ 課程比我讀, 等我可以高d EQ呀?

等多幾日Midby爸就會番喇! 不過媽咪亦都唔會再o係度訓啦! 到時我又會再忙過喇!