Day 99 18 July 09

Midby 99日大喇!!!

呢兩晚好累, 好唔夠時間用。話說一早就已經plan好o係99日宴會播Midby既成長片段, 我本來想o係Midby 爸番到HK之前揀好哂d 相, 同埋準備好個storyboard, o係佢一番到屋企就可以埋手做野, 點知最後都係等到佢番來, 先一齊搞。

細佬好唔話得, 幫我地叫佢design既同事整左棵樹, 個製成品好靚, 真係人見人愛。有左呢棵樹, 影相既效果非常好, 真係估唔到, Midby爸o係前一日突然諗到既idea, 細佬竟然可以幫我地願望成真。

另外又係由細佬一手包扮既易拉架又係極讚! 由影相, design, law 去output, 一手一腳真係唔洗我地操心, 同樣都係當日好多人去同個易拉架影相, 我好相信個dinner 冇左呢兩樣野會失色好多。

Midby既婆婆公公, 麻麻爺爺4點幾就去到酒店, 去招呼一早去到打麻雀既親戚朋友。Midby爸就要將棵樹同埋個易拉架, notebook, etc 早d law 到去個場地, 等早到既朋友可以睇下Midby既相, 寫低幾隻字o係棵樹上比Midby。

係唔係貴人出門招風雨呢...呢一日落雨+打風呀! call左雞記, 陪Midby爸落去等架車來, 之後就快快手番上屋企喇, 成日都唔係好pump 到奶, 因為個心好唔定, 驚dinner前d 野搞唔好。我o係屋企同Midby, 姐姐等到成6點先坐的士出去, Midby著我買比佢既衫仔好靚呀! 我用揹帶揹起佢, 去到個個見到佢緊係開心啦。我先餵奶比佢食, 因為去到酒店正正就係佢食奶既時候, 之後就帶佢去同個個見下面, 打個招呼...成晚Midby都叫合作架喇, 不過直到公公想抱佢, 點知佢就喊喇, 要婆婆出動, 帶埋姐姐兩日一齊抱走Midby。

Midby爸話, bb1個月大去擺滿月又唔識比反應人。3個月大時又識得認地方, 好似Midby咁, 見到咁多人, 同埋個環境同平時咁唔同, 佢呢晚易喊好多。不過佢好合作咁同我地影左好多靚相, 又要謝Midby既舅父喇, 唔係佢, 邊個同我地影咁多靚相, 有個咁好既紀念呀?

我同Midby爸好似wedding 咁, 又係上台講幾句野, 唉...表面堅強既我, 又忍唔住o係多謝媽咪時流左幾滴眼淚。我真心講, 我真係好有福氣,有咁多人對我好, 鍚我, 幫我, 唔知媽咪同奶奶聽到我多謝佢地時, 個心諗咩呢?

大舅父o係晚飯途中大聲講比我地知, 11點會打8號風球, 所以成餐dinner既節奏都比較快。o係酒店擺滿月真係"貨真價實", 係呢個價就呢個價, 冇多冇少。成餐飯o係10點半就搞掂, 我地忙到連Midby要食奶都唔記得左呀! 所以我地o係酒店餵埋餐奶先坐的士番屋企。

今次叔叔好細心呀! 因為打風既關係, 好難先等到有的士入來, 叔叔見到咁, 就出左去叫的士, 我同Midby o係酒店內等呀等...等等下, 見到叔叔坐住的士入來接我地! 呢個叔叔真係估佢唔到, 原來都幾識得照顧人地!

Midby: 爸爸媽媽未有你之前已經講過, 你出左世一定會擺滿月酒開心下! 呢一晚有冇嚇怕你呀? 媽媽抱住你同d親戚朋友打招呼好開心呀! 呢個係個好好既回憶, 等你大個時, 媽媽同你睇番d 相, 比你知道當晚係點樣既!