7個月既Midby今日打6合1針

打6合1針的一天

早o係6個月就應該要打既6合1, 最後等到今日, 足足7個月大時, 先帶Midby去打!

唔開心既係...姑娘竟然唔比姐姐影video!!! 咁點解之前兩次都可以呀? 我好嬲, 仲打電話去問姑娘, 同佢地講我地做媽媽爸爸既, bb打針係好重要既事, 點解我地要比錢出去私家打而唔去健康院打呀?

好在接電話既姑娘都好好態度, 講左幾句唔好意思, 我都算喇...不過我真係好想見下Midby打針時個樣。根據婆婆所講, 佢一坐lift已經靜靜伏o係婆婆胸前, 好似知道又係去同一地方打針。

今朝我打番去同姐姐講, 叫佢同Midby講我地下午會帶佢去打針。如果Midby識聽既, 好可能佢靜靜伏o係婆婆胸前既表現代表佢真係知道發生咩事喇!

婆婆話Midby想去轉頭睇放o係桌上隻公仔時, 就比姑娘打左支針落去喇。佢話Midby喊到面都紅哂, 不過好快就收聲, o係佢放番Midby入去揹帶度時, 未出門口就已經收聲喇!

其實對於打針呢樣野, 我真係好矛盾。我係buy自然療法既人, Dr Simon Chow都講過, 打疫苗係 = 害左個bb。但係我又未去到咁勇, 唔帶bb去打呢d 疫苗; 但帶佢去打, 心就會內疚覺得自己害左佢。

好似佢食既輪狀口服劑...唉, 早知就唔比佢食。Midby未出世時, 我去聽個兒科醫生講個talk, 佢highly recommend 我地帶bb去食個口服劑, 所以我都冇做咩research就決定左比Midby食。但到Cindy同我傾開計, 醫生話食人奶既bb係唔洗食呢隻口服劑架!!!

嬲死呀!!! 我去babykingdom 搵料, 都冇人提過! 係唔係HK 真係太少人餵母乳呢?

Midby未食呢隻口服劑之前, 幾日先有一次poo poo。對於人奶bb來講, 咁代表佢吸引得好! 但食完呢隻野之後其中side effect 係肚瀉 (雖然食第二次時反應已經減少好多), 搞到佢o係2個幾月至4個月時由本來75條線跌到都唔知50定幾多喇!

再諗深一層, 當時兩個月既Midby 係就係飲全人奶, 但我當時未番工, 唔sure日後可唔可以再比人奶佢, 所以就算當時我知道人奶bb係可以唔洗食口服劑, 我都唔夠膽咁做。

我係時候番屋企睇Midby喇! 次次佢打完針, 成家都會擔心佢! 佢發燒又驚佢辛苦, 唔發燒又擔心佢身體係唔係唔識得反應呢? 我揀今日去打針, 係因為聽日會氣溫跌到15度, 如果Midby發燒既, 天氣涼d會令佢舒服d, 希望佢唔會冷親就得喇!

心掛掛, 早d 番屋企睇下呢隻豬仔先!

後記: 今日係Midby打完針既第二日, 同之前咁多次打針唔同既係...佢冇反應呀!! 唉! 好多媽媽好proud 自己bb 打完針之後冇發燒, 其實發燒代表身體有反應, 知道有外來既異物進入體內, 所以去抗爭! Dr Simon Chow都話, 而家呢輩既人都唔知幾耐冇發過燒, 都唔知身體仲識唔識得反應, 咩疫苗都打哂入體內! 所以今次Midby 一d 發燒都冇, 我真係唔知開心定唔開心好! 不過有一樣野可以諗諗既係...之前咁多次都係同時打兩針 - 5合1加埋肺鍊, 但今次係分開兩次打, 唔知有冇關喇!