發燒發左五十幾個鐘頭的一天
星期五晚, 約左Christine同Gigi食飯, 同日, 奶奶, 老爺, 叔仔一齊上來食晚飯。我番到去仲見到佢地, 走之前我抱左Midby錫左佢地一啖...唉, 係唔係呢一啖呢?
我當晚問姐姐, 麻麻lunch食咩, 佢話煲白粥, 因為喉嚨唔舒服, 我聽到就即刻諗: 咁即係作病啦! 作病既時間係最易傳播病毒架! 佢又冇戴口罩, 唔...Midby會唔會比佢傳染呢?
呢一晚, Midby o係佢地走左之後, 同我玩左一陣, 我照樣"食"佢隻手, 樣樣野都好正常咁。不過, 星期六早上五點幾, 姐姐拍門, 當時我已經起左身pump奶。佢話Midby 突然38.7度燒, 之前都冇事, 佢抱上手覺得佢好熱, 所以check下溫度, 我叫醒左Midby爸, 我地即刻戴口罩, 我就叫姐姐同Midby即刻沖涼。
Midby仲好傻唔知發生咩事望住我地...我當時即刻諗起姐姐話麻麻話自己喉嚨痛, 係喇, 係佢!! 係佢傳染左d 病菌喇!
o個一刻, 我有d嬲, 覺得佢唔夠sensitive。如果知道知道作病, 應該要戴口罩, 因為之前已經有一次又係佢傳染病菌比Midby。
我好反對食藥, 成日都覺得身體會識得去fight d virus。不過今次高左小小, 成38.7度, 我搵番之前keep低既藥, 用針筒比左Midby食, 再比佢飲奶, 到9點幾起身, 佢既體溫低左d, 但係都唔係完全降到正常水平。
好辛苦等到12點我補完習, 同Midby去左睇兒科。醫生話有可能玫瑰疹, 亦有可能係其他原因, 多數等到72小時之後先知道。佢檢查左耳仔, 聽左個肺, check埋喉嚨, 佢話有小小咁多紅, 又唔多似因為喉嚨發炎而令到佢發燒。
呢個早上, Midby發燒最高39.1。
到星期日, 我又帶左Midby去睇另外一個醫生。其實可以唔洗睇既, 因為Midby都未燒夠72小時, 但係我見到佢身後其實已經有d 疹喇! 玫瑰疹既特徵係燒完之後先出疹, 但係佢o係第1日燒時, 背部已經有呢d 疹 (係好少好少既, 唔留心完全唔會見到, 係姐姐咁細心同佢沖涼時先見到話我知! 我都仲要好細心細心睇先見到), 所以我有d 擔心佢唔係出玫瑰疹。
我都有同cement's husband傾過計, 佢好細心同我講, 呢個情況可能係d viral infection, 令到佢有呢d 疹, 佢就建議我去多睇一次醫生, 所以sunday 都要上網搵下邊個兒科開!
比我搵到陳小敏醫生。網上姐妹話佢開藥重, 但係呢次經驗好ok喎!佢對我地好好呀! 佢好細心解釋野比我地聽, 佢話Midby o係燒左第2日時佢所見到既紅點肯定唔係玫瑰疹, 不過佢唔敢講究竟Midby而家發燒係咩原因, 叫我地都係番屋企等! 佢話有時亦有可能病同出疹一齊發生。
由星期六早上五點到星期一今日下午五點, 已經60個小時喇。Midby已經燒左60個小時, 佢胃口差d, 要用spoon feed 奶, 唔知同佢出牙仔有冇關呢...cereal, congee, 咩都唔食, 只係星期日食左1 bottle sweet potato, 之後呵左3次, 將d sweet potato 呵哂出來。
Midby爸今日都冇番工, 而婆婆都出左來睇Midby。婆婆就覺得Midby唔太似病, 但我地呢兩日見到佢, 真係比平時少左笑同玩!
本來今日佢早上食左退燒藥既temperature 都降得幾好既, 一到late afternoon又高過 (聽講人既body temperature o係late afternoon 最高, 所以fever 時亦會好高, 呢樣野o係我同Midby身上都係正確既)。我同Midby爸講, 儘量將食藥既時間推遲d, 身體發燒一陣唔會有咩事既, 咁細個小朋友食咁多藥好慘...!
最後Midby o係6點幾時食多一次退燒藥, 而慢慢慢慢到晚上9點幾時已經退得7788, 就連退燒藥過哂藥氣之後佢都冇再燒了(真係唔抵...應該可以唔洗食埋呢次藥架...不過冇計啦, Midby爸過佢當時成39.1呀)
總結係: Midby燒左65小時左右就退燒, 過左第二日先出疹, 先o係背部, 當晚又番去睇黃南, 佢話似出roseola, 仲指出某d 紅左既rash就係roseola喇。佢話如果Midby呢晚仲出多d, 而冇再番發燒就真係出roseola了! 另外點解佢fever 第1日已經背部有d 紅, 佢話係temperature 高左, 令到微絲血管抗張, 亦會有呢個情況! (勁呀! 真係專業兒科醫生呀!)
Midby亦如醫生所講, 當晚多小小疹, 到第二日最多, 之後就慢慢無了。
出疹出到頭同面都有小小, 反而手腳就冇, 如果唔係留心睇Midby, 其實真係唔多覺得佢係出疹。
我好優咁諗, 死啦...出咁少, d 毒素出哂來未架? 反而婆婆話, 如果佢冇咩毒素, 何來可以出得好多呢!
發燒既時數多少我唔知道同bb既身體抵抗力有冇關, 不過Midby 今次發左兩日幾燒加埋出疹4-5日就完全冇哂事, 我又好想認叻...係佢飲媽媽奶既功勞!
Midby: 真係好在你今次係出玫瑰疹乍, 唔係既, 白白燒左65小時好唔抵呀!!!
星期六同日晚, 我叫姐姐煲d carrot 水比佢飲, 飲左之後噁左d野出來, 係d 似痰既物體, 味道仲非常難聞, 好喇好喇...痰出哂來就好了! 呢d 痰係應該o係Midby前陣子比Midby爸傳染時得來既, 到今日都仲有呢d 痰, 我地好想將d 痰整出來, 不過小朋友又唔識吐痰, 點幫佢呢?
TBC
Posts
No comments:
Post a Comment