陪月 - 兒姐建議

我個好姐妹sonia 介紹左佢一位由循道衛理請既陪月, 兒姐。佢第1同埋第2胎都係由兒姐幫手既, Sonia將佢介紹比我, 好好彩, 我都mark 到佢下年4月幫我手。

o係21W1D 既一個晚上, 我同兒姐第一次見面。佢比左以下建議我

1. 沖bb 奶既kettle 要將d 水煮到100度, 我屋企係用一般放熱水, 加溫就停既kettle, 唔夠熱, 要換一個有溫度計既, boil 到d 水到100度, 之後keep warm 到60度, 60度係沖奶粉既溫度, 有5L, 有3L, Sonia 就用用5L"Kojiroushi", 覺得好方便, 唔洗沖奶時估估下個溫度
2. 一個洗澡盆加張細椅子 – 唔洗貴, 個盆唔洗太大, 因為bb 大個可以坐o係個盆度, 唔一定夠佢成個人訓o係度先買, 陪月話佢會o係浴缸旁邊既toilet 上面放個盆同bb沖, 坐o係細椅子上面, 就唔洗成個人彎個身將個盆放入個浴缸度
3. 膠盒仔x 2 – 比我地裝熟水, 同bb 洗pat pat 同面, 因為呢d 地方要用熟水架
4. 可以考慮買唔買個可以推得既細櫃仔, 好似d 推餐o個d車仔, 咁樣去到沖涼時, 訓覺時都可以將架車推來推去用, 唔洗大, 唔洗貴
5. 一個放奶樽既盒, 等d 奶樽清潔好之後放o係同一個地方度, 乾淨同埋方便d, 可以去日本城呢d地方搵, 最好可以放到12個奶樽, 最好有兩層
6. 如果屋企有真空煲就好, 方便anytime 想飲番d 湯都可以, 唔洗行來行去warm 番d 湯
7. 坐月真係要勁休息, 我個陪月講比我知佢有個客, 一生完bb, 當時係新年, 佢1日有成50人去探佢, 搞到個媽媽好累, 太多人, 又易感染, 結果流出d 綠色既分泌呀, 好長手尾。所以坐月時要勁訓, 有陪月來既day time 就去訓, 唔洗擔心要跟陪月學野, 因為陪月stay o係度成個月, 一定有時間學, 如果唔請陪月既, 都o係屋企人day time o係度時, 去勁訓, 經驗證明唔夠休息既媽媽身體好受影響, 以為點補都補唔番
8. 坐月唔係只坐30日, 可以坐足3個月, 即係100日都可以飲湯水keep 好個身體
9. 可以既用人奶餵bb, 不過餵bb時又食中藥就小心, 有個媽媽又食當歸又去餵人奶, 但係bb 唔受得當歸....所以呢d 野要小心
10. 唔好"mouth" o係度, "mouth" 得多, 對子宮唔好, 有好多cases 都係個媽媽會早產
11. 坐要坐直, or 坐有背既椅子, 唔係老來就知死
12. 唔好亂洗頭, 我個陪月叫我要洗就同佢講, 唔知佢咩意思
13. 生完o係醫院唔好飲水, 飲米茶, 因為水好多風, 唔好飲呀
14. 入院前整好姜水, or 叫亞媽探我地時帶來, 用來生完之後洗手用, 都係o個句, 唔好用水
15. 生完頭幾日, 千萬唔好飲魚湯, 姜飯, etc。我地亞媽o個代就以為要咁做, 原來姜o係頭幾日, 有傷口時唔好食呀, 頭幾日身體弱, 都係食得好青淡既野食, 好似一般菜, 瓜, 等到傷口埋d 喇, 冇野流出來, 就可以開始慢慢補
16. 產後28方唔係個個都o岩, 如果個個都o岩, 唔洗睇中醫, 唔洗要陪月了, 補品都係, 唔係個個都要食, 睇番體質, 我之前有朱古力瘤, 係就係唔大粒, 不過已經唔可以補, 所以唔洗咁早買定茸呀, 冬虫草, 除非中醫把過脈話你既身體可以接受呢d 野
17. 可以既就搵番自己睇開既中醫, o係生完之後幾日, 我地會帶亞b 去健康院時去睇埋中醫, 睇下當時體質點, 千萬唔好, A 小姐食過好既方, 就law 來比自己食 (我都o係baby kingdom 見到有d 媽媽買左好多茸, 同埋花膠燕窩, 竟然唔o岩食, 要平價賣出, 所以清楚自己體質先好去補)