6個月媽媽望女成龍?

呢一兩個星期, 唔係忙學校assessment 就忙part time evening teaching, 一到唔洗教evening o個晚就急急腳番屋企見Midby。

陳太講過, 佢o係家姐細佬細個時, 佢都係咁樣 - 一放工就急急腳番屋企, 覺得屋企有d 好貴重既野o係度, 要第一時間番去, 而我到今日終於可以感受到喇。

由於6個月既bb識既野多左, 同我地有亙動, 同佢相處比之前更加開心。足6個月既一日, 婆婆帶Midby 去健康院 (好多次都係由麻麻帶, 今次係婆婆帶), 我就之前一日寫定Midby既食奶情況, 等婆婆識得答問題。

呢一日姑娘同Midby打肺炎既第三針, 之前兩支都係kinetics 打左喇。Midby同之前幾次打針都係一樣, 都係好快收聲。姐姐話佢過左一陣又諗番起, 又喊左幾下, 不過係時候飲奶喇, 比左支奶佢, 佢就收聲。足6個月既Midby仔重7.4kg, 過左50條線, 可能係因為食左米糊既關係, 頭圍ok, 冇再繼續大。

另外姑娘都要用Midby做d test既。姐姐同婆婆話Midby o個朝都好好心情, 本來訓左覺既, 到佢時, 姑娘叫婆婆整醒佢, 姑娘之後用一隻手去support Midby仔坐, pass左! 之後比玩具佢左手交右手, Midby好快就可以做喇, 姑娘即刻讚佢叻女, 當然婆婆聽到緊係開心啦...作為媽媽既我, 係唔係我太理智呢? 我覺得BB 到左6個月係應該識得做呢d野, 我又唔會為左人地讚佢, 而覺得Midby叻。

可能我一直都同自己做心理x導, 叫自己唔好對Midby有太大期望, 又叫自己唔好成日覺得自己既bb叻或者醒過人...一切一切我都係唔想自己將來唔開心, 唔想Midby suffers 太大壓力。

做父母都想仔女成材, 我都唔例外。不過我最希望既係Midby身體健康, 開開心心, 有健康既品格。佢叻唔叻, 讀唔讀到書, 我幫到既就幫, 最後都係靠佢本身既努力, 先至會成功。

我同Midby爸讀書唔係少, 我地都好想Midby讀到書, 但係眼見好多父母, 為左仔女讀書讀得唔好而唔開心, 我好驚...幾時會到我?

所以我成日同自己講, 理智d, 人地讚你既bb 叻, 靚, 只係禮貌, 唔好咁認真當以為真。有時見到有d媽媽成日都o係人面前讚自己既寶貝幾咁同其他bb與眾不同, 發展幾咁快, 我都心底裡面笑一笑佢 (Midby...你唔好學媽媽咁無品呀!)

話雖如此, 有時我同Midby爸對住Midby, 都會忍唔住, 讚下佢...因為bb, 無論係咩國籍, 咩種族, 佢地既一舉一動都係好可愛既, 加上Midby係我地既骨肉, 所以我地一齊同Midby玩時, 都忍唔住心底內讚下我呢隻寶貝豬豬!

做媽媽既我幾咁矛盾...唔想比壓力自己同個女, 不斷叫自己relax, 但其實就係驚自己sooner or later 變成望女成龍既媽媽!

而家先得6個月既Midby仲有漫漫長路要行, 睇來我真係要搵個comfort zone 去handle 呢d 問題!