PS 既小寶貝出世喇!!!

時間過得好快, 仲記得PS 點樣o係MSN 同我講佢有左bb, 仲記得Midby 3個月既party請佢來時佢個肚仲係細細既...尋晚, 佢既小寶貝出世喇!!

話說約左幾次既約會終於約到喇, 因為PS都放maternity leave, 再唔上來我度law野, 真係到佢生時都未law到。我補左習冇幾耐佢同D就上來。

佢地仲買左個combi波仔比Midby玩。呢個波成為令到Midby kar kar 聲笑既好工具。而家比佢, 佢唔係太識玩, 反而有一日無心插柳, 我同姐姐將個波拋來拋去, 個波發出聲音, 佢見到聽到就笑到唔停。

當日見到既PS個肚好明顯大個左好多好多喇，話哂都叫做38W, 就快生喇! 佢手手腳腳一D 都唔腫, 望上去好健康, 好精神。點知過左兩日, 即係公眾假期星期一, 我同Midby, Midby爸行緊去坐12號時, PS打比我, 話佢見到d啡色既野, 佢仲傻下傻下話唔係紅色既, 只係似作m之前既顏色。我話呢個係架喇, 因為我見紅時都係有勁小小小小量既啡o係underwear上, 不過見紅去到生真係有排等, 我叫佢都要準備喇, 佢番到屋企之後around十點左右, 去去下洗手間就穿水喇。

好在佢揀左去仁安, 同佢屋企咁近。去到醫院, o個時我仲以為佢半夜會生, 因此我一直以為穿左水之後知幾個鍾就要生, 點知一直等等到第二朝D打番比我話PS 9點幾時要吊催生藥, 開始有d 痛喇, 要用笑氣喇! 其實佢半夜時都有d痛, 唔係幾訓到, 但子宮唔係好開, Dr Wong都講過佢子宮頸較長, 產程會長d, 但我冇諗到穿左水咁多個鐘子宮都仲唔開架嘛!!!

我好替佢心急, 自己生過bb, 仲係咁近既事, 我終於明白...儘管冇咩野可以幫到佢, 但係都好想見佢, 睇下佢點。

我而家先感受到, 諗番起我o係醫院下午等緊Midby出世時, 老爺奶奶好想出來睇我, 我o個時同Midby爸都話唔好, 因為佢地出到來, 都係得過等字, 係冇意思既, 所以Midby爸堅持叫佢地唔好出來...但我而家後悔, 因為PS o係醫院等o個段時間, 我個心好唔安樂, 好想打比D問佢Update, 又驚阻住佢, 我終於明白當日老爺同奶奶既心情。

由於PS早上吊左藥(催生應該先放藥, 但因為穿左水, 所以唔可以放粒藥, 驚會影響bb, 所以要直接吊藥), 開始有勁d 既收縮, 幾分鐘痛一次, D話佢大力捉住佢隻手, 我知道PS應該辛苦緊, 頂緊!

到左中午時, PS都係開得2-3度, 同埋已經停左藥喇, 因為每次contraction 都會影響bb既心跳。去到4:45 D打比我話都係情況一樣...唉, 我仲以為開左頭幾度, 之後會開得好快, 點解佢既子宮唔可以幫下手, 快快趣趣開左佢, 等bb出來呢?

去到6點幾, 當時我去完護協買野, 行緊去搵車坐, 打比D, 佢話Dr Wong已經去緊醫院...唉! 6點幾Dr Wong正常應該仲未收工, 我估Dr Wong都覺得PS要開刀喇。

我聽到出D既唔開心, 我個心好酸, 其實生bb o個個當時頭腦已經比痛蓋過左, 根本冇時間去諗其他野, 反而o係佢身邊o個個就替佢著急, 為佢擔心。

我相信PS之前同D講過佢想natural birth既意願。PS好想bb o係natural birth既情況下出世, 感受到佢o係產度走出來, 呢種母愛好偉大!

相比我...我堅持natural birth堅持到抑鬱咁濟, 都只不過係唔想開刀影響自己日後既身體健康。有冇為左Midby而想natural birth? 我而家反思, 真係冇!

o係PS身邊既D, 知道PS既意願, 好想比佢再試下, 等下子宮頸肯唔肯開多d; 但另一方面, 佢話見到ps 咁辛苦, 佢都有D 動搖。

不過去到6點幾, 當Dr Wong話去緊醫院時, 佢地都心中有數, 知道開刀呢個Option 越來越近。因為醫院唔比佢地要試喇, Dr Wong話其實隻手已經摸到BB既頭, 只不過子宮頸唔夠大, 比唔到個頭仔出來。醫院就因為每次contraction 都影響bb 心跳, 下午時bb心跳一o係contraction時就drop 到去6x, 之後會好快升番到8x, 9x, 但時間長左喇, 佢好慢都升唔番上去, 醫院為左bb 既安全, 唔比PS 要等喇。

本來叫奶奶o係番屋企8點幾時,law d 米水o係車站比佢地, 不過知道6點幾都未生, 所以我就冇叫佢去喇。去到8點幾時, D 打比我, 第一句話: 唉! 終於都開左刀喇!

事後PS同我講, 佢o係手術室見到D入去時狂喊, 我明...我明, 作為一個媽媽, 咁努力去順產, 等左咁耐, 只係最後一刻, 要去接受一個從來都冇考慮過既option, o個種心情, 真係好難受。

Baillie 同PS既情況好似, 唔同既係佢一開始入醫院時已經決定左開刀, 因為佢有regular contraction開始入醫院時, 醫生已經講佢子宮頸長, 會產程好長。醫生都比兩個options佢, 一: 開刀; 二: 順產, 不過痛好多個鐘都未必開到夠度數, 可能最後要開刀。

Baillie打電話比我, 問我意見, 由於我唔識佢個醫生, 我個人好衰會懷疑醫生係唔係想快手搞掂佢, 而話佢產情長。我同Baillie講我係佢, 會揀順產, 唔得時先去開刀, 好在佢冇聽我講乍...!!!

到左今次, 呢番說話係出自我相信既Dr Wong口中, 我都有d 擔心, 仲記得PS o係 msn同我講既, 我o個刻即諗番起Baillie既case。我都o係MSN度暗示過, 問過佢對開刀抗唔抗拒, 佢好堅持話要順產, 因為咁, 我冇同佢講Baillie既case。

我叫自己一定要打呢個post, 係因為我想同PS講: 當日一直陪住你既D, 好令我感動。D冇講過D咩說話令我有咁既感覺, 但總之同佢傾咁多次電話, 佢既語氣同態度, 好令我感受到佢既心情, 同埋佢你o個個心。

我亦好想同PS講: I'm proud of you!!! 你有好大好大既勇氣, 去生呢個bb。我識無數人都係試都唔試就去開刀, 餵人奶? No way! 而你痛左咁多個鐘為左bb, 都去堅持順產!! 你好叻!!!

我亦再一次感謝主, 令我再一次知道自己真係無比幸福同幸運。我自問唔係一個咩好人, 點解我同Midby仔咁受到上天既照顧, 成個生產過程可以咁順利。

所以我會做多d善事; Midby仔懂事之後我會教導佢點樣做個好人, 點樣多d去幫助人, 點樣做個對社會有用既人。

可以栽培到Midby成材當然係好事, 但我亦唔會忘記培育佢成為一個品格健康既人!