唔肯食奶

hi. 我係midby爸，BB出世咁耐都係midby媽出post，等我今次都打番啲嘢先！


其實midby間唔中都會唔肯食奶，midby媽早就已經怕咗餵奶（又係既，自己咁辛苦pump奶，個女唔肯飲，又真係好傷心）。話說噚日，midby媽要幫學生補習，為咗唔想嘈住佢地，我諗住餵完midby食奶之後，就同佢去行下商場。一如所料，又係唔肯食。其實我試過好多次，擺好個餵奶姿勢，行一陣之後俾佢食，就算第一啖唔肯，第二啖都會食。點知今次試咗幾次都唔work，唯有抱midby落樓下試下。就係咁，由10am到11:45am，一個鐘頭45分鐘入面，我試過屋苑平台、clubhouse入口、屋企樓下公園、公園海旁、再番屋企、再落clubhouse、入clubhouse個playground，試過俾佢瞓、tum佢玩，施以適當暴力．．．等等，佢都係唔肯食典發脾氣（仲要係擺個奶樽埋去就識推開，放開左即刻收聲）。以為個女冇厭奶期（因為我見好多人好早就出現），兼覺得個女會屈服o係我X威之下，今次我真係投降，個頭就有一團黑雲，番到屋企midby媽都見我黑晒面。Midby媽補完習之後，用匙羹餵cereal，midby好快就食晒，仲要食左8羹，勁勁呀，好明顯地係肚餓，但唔肯食奶啦！


同midby媽賽後檢討，發現有以下可能性：

1. 厭奶
2. 平時midby牙痕多數都係挖下面d牙仔，但呢幾日佢好多時係反手 (冇錯，係反手）挖上面，所以可能係上面又想出牙仔；
3. 網上有媽媽分享，原來有啲BB會覺得自己大個，識過用其他方法之後，會開始唔鍾意用奶嘴（即戒奶嘴）

厭奶既話，冇理由佢最終都會食，又或者轉左用羹佢肯食喎，所以應該唔係厭奶。如果係可能性2或者3，咁我地應該高興呀，因為midby又有progress喇。

希望midby真係覺得自己大個女，我地可以俾佢用多啲學習杯學飲野。呢一兩日我地用NUK杯放水俾佢試，不過唔知係咪個杯啲水流得好快，飲到漏晒水，如果係奶就慘喇。midby，你要叻叻，快啲學識呀！