冇乳爸爸

midby媽係一個母乳媽媽，至於我，就係一個冇乳爸爸...

其實想打呢篇Post好耐，想向midby媽致敬。

記得midby仲未出世，midby媽已經再三叮囑，佢會堅持餵人奶，作為冇乳爸爸，唯一可以做既，就係俾佢無限既支持，因為我知道，餵母乳同埋要堅持餵母乳，都係非常非常艱巨。對媽咪既健康，亦係一個好大既挑戰。midby出世之後，佢唔可以埋身食，midby媽要用pump，初初要面對痛楚、谷奶、出血、塞奶，附加既焦慮、驚恐、不知所措，又要經常半夜起身（以前仲要起兩次身），精神又唔夠，放棄呢個念頭，都唔知出現過幾多次。見到midby媽咁辛苦，內心其實都交戰咗好耐，生BB已經受咗一次苦，有邊個做老公會忍心見到老婆咁辛苦？但我又好記得，midby媽對母乳既信念，之前對母乳所做既research (應該話係data searching)做得咁詳盡，見佢咁有決心，我硬住心腸冇叫佢停，又問下陪月呀、搵下資料（係咁意），希望可以幫到佢。有時見到佢喊，亂咁講嘢，我都忍唔住鬧佢一輪，但係過咗一陣又後悔。如果換轉係我，我都冇信心可以面對。

捱左一排，開始變得順利喇，塞奶既情況亦都少左，奶量又多左，見到D奶袋塞滿咗個冰格，心裡面不禁讚嘆一番。midby媽其實都掙扎過：pump奶用左咁多時間，照顧midby既時間少左，驚midby唔認得佢，但係依家midby都好跟midby媽呀！

諗番轉頭，做冇乳爸爸，都要付出，唔可以淨係享受成果：

1. 捱夜：其實媽媽一個人半夜起身餵奶係好辛苦同悶既，尤其是pump奶，又唔係對住個女，無所事事咁，黑麻麻，真係幾難捱。依家我都冇陪midby媽 pump奶喇，但係最初一兩個禮拜，如果媽媽有需要，一定要主動幫手，出手、出力、出熱水，可以幫既就幫，因為輪辛苦，佢比你辛苦百倍；
2. 主動：母乳媽媽用左好多時間去pump奶，所以照顧小朋友既時間又會少左。就算有工人，媽媽都唔會太放心，所以要主動去學，多D 向媽媽update BB既進展，等媽媽知道bb食緊佢製造既奶，可以健健康康；作為爸爸照顧bb，媽媽亦唔會覺得bb跟左其他人唔要媽媽；
3. 支持、支持、再支持：眼見好多母乳媽媽最終都放棄，好多都係因為以為自己冇奶，又或者係怕痛。其實包括midby媽在內，餵母乳都經歷過呢個階段，好難話一開始就好順利。要對媽媽有耐性，耐心聽下佢既苦處，盡量滿足佢既需要，但又唔可以俾佢輕易放棄，作為丈夫，佢軟弱既時候就係睇你頭，你既想法、支持，對佢會有好大影響；言語既支持亦都好重要，女人唔同男人，一句窩心既鼓勵說話，勝過一切物質。

先旨聲明，我冇話我做到晒以上既野，事實上，我都係後知後覺，要midby媽受左唔少苦楚先知道點幫佢。所以，我真係覺得佢好偉大，為左midby佢真係好辛苦。雖然我成日話佢silly，好多野都唔叻，但係佢對midby既付出，真係令我覺得好感動。

midby媽，你放心啦，midby將來一定會健健康康，同埋好錫你架，因為佢身體每一寸muscle，都係你俾佢架！