27w1d 產檢+4D

濕度得番30度既一個冷冷天

等左4個幾星期, 對上一次係12月11日見Dr. Wong, 足足一個月喇, 今日1月10日又去見Dr Wong喇, 滿懷希望, 想見下亞女個樣。

由於Dr. Wong 's clinic 可以照埋4D, 早o係19w時佢已經同我照4d架喇, 不過早期只係照下d 手呀, 腳呀, 到今日, 27w, 醫生話今次照係好fit既時間, 今次唔做, 下次仲難, 因為佢好易會比d 手腳遮住, 但係上兩次 - 19w, 23w 到今日既27w, Midby 都唔比我地兩個見佢呀。Dr Wong話好多人都好易做到4D, 見到bb個樣既, 不過我就唔係太好彩了。Dr Wong好好, 佢話佢下個星期二同買冇咁忙, 叫我再去, 希望比左bb個樣我睇。

其實我出左去一次行左一陣路, 希望Midby換下位, 佢係就係有郁, 不過呢我再入番去照時, 唉, 都係比胎盤遮左小小, 不過我都好開心, 有幾個angels 見到佢個半塊面, 有個鼻仔, 不過對眼就見唔到喇...

我總係覺得even 下個星期二再去, 佢都唔會比我見。

雖然4D照得唔係太成功, 不過我要贊下女女佢咁多次做結構檢查同oscar scan都極度合作, 不消幾分鐘就已經完成。就係我太過沾沾自喜喇, Midby而家罰我喇。所以呢家野真係唔可以唔信, 小朋友係好鬼小器架。

另外我問Dr Wong 幾時bb 個頭會倒轉, 佢話呢個時間都應該開始會架喇, 佢仲話Midby個頭都已經落左盤骨, 不過醫生話仲未定既。就係因為佢落左盤骨, 所以難睇到個樣 (其實我唔係好明, 因為醫生話bb而家個pat pat o係我左面, 頭o係右面, 何來個頭落左盤骨呢? 唔明...)

我呢個亞媽, 去照U/S 都唔係enjoy 見下個女既, 我反面勁留心睇d figures。Midby 隻今次好大隻呀, 唉, 有d 擔心, 上次22w6d 去照時有d 地方 (好似肚圍) 細左一兩日架, 今次已經快人成兩個幾weeks, 好似成個圍有成24.x cm呀。Dr Wong 冇print 個summary table 我睇, 不過我記得佢度個肚圍時, 個measurement 去到29w幾了。另外有d地方都比較大左小小, 不過好在最後計番條數佢就話都係within normal range, 不過有d 擔心自己係唔係有糖尿呀...

Midby 都算係咁, 27w 有11xx g, 即係2磅幾了...

本來我好開心, 因為覺得Midby 咁大隻咁健康, 我又咁長胎, 不過唔可以100% sure 我冇糖尿病架嘛, 點好呢...要等到1 月21日去廣華先check, check 完仲要等report!

做人亞媽真係唔易, bb唔長肉又驚, 而家長得太多又驚...唔知我可唔可以順產呢? 我唔貪心, Midby 有7lbs 我都好心滿意足, 我唔洗佢成8-9lbs 架...太大, 我點生呀?