27w3d 照4D前一晚

仲係好乾, 沖完涼要塗油o係身既一天

呢幾日發現, 原來我已經有肚紋了。

唔高興? 當然有! 邊個會高興? 有肚紋, 我仲可以去影我一生人第一次, 亦都係得一次既大肚相咩?

有肚紋, 我可以著比堅尼嗎?

我而家有既肚紋, 你估唔會深色落去, 唔會加多咩?

你唔係我, 你唔係大肚, 你會明咩?

d 肚紋生o係我身, 唔係你身, 你會明咩?

未有bb前, 見到d 姐妹大肚, 我覺得佢地好偉大, 因為個肚一日一日大, 肯定對肚部既muscle有影響, 生完都唔知可唔可以回復之前既彈性。

到我喇, 到我有左Midby, 我都估唔到, 我冇介意個肚一日一日大, 亦都冇咩擔心以後修身既問題。

但呢幾日, 眼見到比堅尼位出現幾條可憐既肚紋, 我開始介意。

我當然唔會同人講我介意。冇呢個問題既人會明咩? 有呢個問題既人咪答你: "我都有啦..."。費是講出來又比人話我!

你話女人偉大嘛? 肯定偉大, 只不過我唔係當中一個。

我今日仲比妊娠糖尿病呢個問題困擾。但神好好, 賜比我呢一種特強既適應能力 - 我好快可以接受問題。就等如N咁多日之前, 我有腳痛, 我有腰痛, 神都賜比我力量去一一克服佢地。所以我知道我好快心情會平靜下來, 慢慢等到1月21日, 答案自有分曉。

不過我太多言。正如亞媽所講, "柯屎唔出唔洗同人講"。講左出來, 人地幫到你咩? 費是又比人話我緊張大師, 過份擔心, 咩咩物物, 唉!!!

Being explicit & expressive 唔係一個優點, 似乎呢樣野我真係要的起心肝去改。

Midby, 媽媽真係好想見你, 你聽日乖啦...你次次都好合作架, 點解一照4D就同我玩hide and seek 架? Dr Wong 好忙架, 如果聽日你都唔比我見, 媽媽真係o係你出世時先見到你架喇!!! 唔公平呀, 你都見到媽媽爸爸, 點解你唔比番我地見你架!! 咁細個已經咁古惑喇?