28w6d 番媽媽屋企食團年飯

放新年前兩天

今日成日都望住個手提電話, 仲將佢放o係桌面, 驚廣華打比我時聽唔到, 真係人都癲。

我打左去廣華問, 個接線小姐話一般要等成兩-三個星期先會打比我地, 信佢真係死得人多喇,佢話因為醫生睇完個report 有事先會叫人打電話比我地, 但我上網見到d 人話快則第二日, 慢則幾日都會收到電話喇, 再加上我親口問左位姑娘, 所以我假設星期六 (blood test on wed 等到 sat, 即相隔3日) 仲未收到電話, 就當我pass左個blood test 架喇。

今晚番到媽媽度, 都唔敢食咁多野, 好大膽飲左幾口zero sprite, 連平時我好想飲既海參湯都唔係好敢飲。以前未知Midby 咁吸收既, 梗係想飲多d, 比多d 營養佢, 而家就開始驚佢過份大隻喇, 搞到我順產唔到。其實我而家食少左野都有d驚，又驚佢變得瘦隻仔喎, 所以本身打算2月頭, 相隔成3個幾星期先見Dr Wong, 而家都想改番做1月尾去見佢, 睇下Midby既progress。

由於都已經28周喇, 我feel 到 Midby 郁既次數真係多左好多。好在仲未去到一個disturbing 既階段 (因為好多人都complain 話BB 郁到佢訓唔到覺)。Midby 每一個小時都有段時間比較active, 多數係9點半呀, 10點半呀, 11點半呀, 之後去到下午就靜d, 再去到5點半呀開始又來過。

好cute既係我今日起身時, 同Midby爸講野, 點知就feel 到Midby 郁喇, 佢好似聽到我講野, 知道我醒左, 之後佢就開始活動喇。雖然佢而家仲o係我肚內, 我當足佢做一個好懂性既小朋友, 我唔敢o係佢zzz覺時太大聲嘈到佢, 希望佢出世之後都係一個好有規律, 作息定時既小朋友啦。

係喎, 唔記得贊下Midby, 上次番媽媽屋企時, 佢只係郁比公公, 婆婆睇；但今次就唔同喇, 婆婆同埋舅父放隻手上去時, 我叫聲Midby, 佢即刻郁比佢地睇, 到走時o係72x站, kacey 又放隻手上去, 都feel 到佢郁呀! Midby, 你唔好乙水到媽媽咁開心啦, 你咁細個就咁懂事喇?