27w4d 終於照到4D喇

好開心好開心既一日

等左咁耐, 真係可以見到個女係點樣了。

照左前後都係5分鐘, 因為Dr Wong 冇收我錢架, 仲print左幾張相比我tim! 仲比埋隻CD, 有哂我之前產檢既資料, 即刻upload上去比細佬, 叫佢比媽咪睇。

從前我會擔心女女唔靚, 我會唔會唔錫佢。

老實講, 第一眼見到女女真係同我想像既有d 出入。

但我離開clinic之後, 真係忍唔住開心到不斷講"我好開心, 我好開心"。

因為呢個點都係我同Midby爸既結晶。

聽起來好老土, 細個時一d都feel 唔到愛情結晶有幾重要。

但而家一諗起呢個BB 係有我同Midby爸既基因, 流住我地既血, 真係覺得好安慰。

雖然Midby爸趕唔到黎, 有番隻CD, 同埋有幾張相, 我好相信佢都好開心。

亞女好似有個大鼻呀! 面仔有肉架喇, 有幾深既人中, 媽媽話佢有個深既眼窩 (我唔係好識睇), 應該會係醜樣豬。

其實我覺得BB 係知道我地用4d去照佢既。

Dr Wong 一scan 佢, 佢對眼仔打開喇, 過左分幾鐘, 佢仲開始又玩hide and seek, 用隻手遮住自己半塊面喇。

Dr Wong話佢係怕羞形, 哈哈。如果似我, 點會怕羞呢?

我總係覺得bb已經有"性"架喇。我今日同esdlife 一個姐妹o係走廊傾緊野, 唔想咁快入去見Dr Wong, 想等埋Midby爸來, 所以我都有d措手不及。

亦都因為咁, Midby似乎未準備好去同我玩 hide and seek 喎, 所以一scan 時, Dr Wong 就笑, 話好野, 今日會見到喇。

即刻show 4D比我睇, 我就見到我個心肝喇。

佢口郁郁, 對眼又打開, 都唔知似邊個。Cindy話佢做4d scan時, 覺得一言好似佢老爺, 但係我睇極都唔知Midby 似邊個呢?

Midby: 媽媽愛你呀! 你好抵錫呀!! 以後我地有漫長既道路...同你一齊走, 你同我, 同埋Midby爸都要一齊努力呀!!!