全家病了!

3月6日

呢一日本來滿心歡喜去上Dr Poon 1st 堂, 之後同Midby爸去organic 拍拖, 點知半夜時, Midby爸發冷, 令我諗番之前乳線炎又係發燒前發冷, 點知早上一起身真係發燒!

結果我同姐姐同Midby3個去左上堂, 留番Midby爸一個o係屋企, 等睇醫生。

事源係姐姐喉嚨痕, 有幾聲咳, 佢已經戴左口罩了, 不過幾日來都係差唔多又冇咩惡化, 所以就時戴時唔戴, 可能咁樣已經傳左比Midby, o係某一日佢咳多左喇, 同時Midby都有發燒 -- 佢起身時姐姐抱住佢, 我摸到佢有小小熱, 一check就37.5-37.8度。我地冇同Midby佢去睇醫生, 之前佢都有試過係咁, 呢一日比多d 水佢飲, 洗多一兩次澡, 等佢身體去打下仗, 飲多d 媽媽奶, 夜晚已經冇燒, 同之前o個時一樣。呢種mild 既fever 都係lasted左十個鐘頭左右, 不過第二日係最辛苦, 最嚴重既, 鼻水, 眼水, 一齊流... 好在Midby照玩, 照跳! 呢d 就係bb 同我地大人既分別喇!

Midby將佢成隻手指放左入爸爸口中, 爸爸話: 今次BIG PAN 喇, 仲唔到佢病...點知真係搞到佢病。

而我因為呢一兩個星期好忙, 堂堂都講好多好野, 喉嚨已經麻麻地, 加上d virus, 我又傷風了。

打後呢幾日, 全家日日都戴住口罩. 只係Midby唔洗戴。

Midby爸就最嚴重, 發燒退左之後一日又再發過, 睇左兩次西醫, struggle 緊食唔食抗生素, 又睇埋中醫, 懷疑肺炎, 而家仲o係屋企休息緊, take 緊第4日既sick leave。

今次既人傳人病毒/ 細菌感染令我覺得, 人可以突然間好fragile! 以為小小病菌唔會對我地有咩影響, 點知就算幾小心都好, 係要入侵我地就會入侵!

今次亦都比我見到Midby爸真係比我堅強同clam! 比著我, 咁樣發燒法 (最高去到39.5-39.8度) 已經會亂哂龍, 佢好calm咁同自己講, 唔over 39度唔食panadol, 等身體正常咁去抗病菌, 佢又識得同條毛巾o係背部吸汗, 又識得有邊d 西藥唔洗食, 又識得去分析而家應唔應該去食抗生素, 總之自己識照顧自己, 真係唔洗我去操心!

我呢...有左Midby之後, 仲大意左, 見到Midby爸發燒, 既然唔識得去整粥佢食, 係姐姐提我先識!!!

我成日都話人最緊要係身體健康, o係呢個星期內, 我更加發覺, 人有好既健康同體魄絕對唔係必然, 好懷念自由既空氣, 幾時先可以唔洗O係屋企同訓覺時戴口罩呢?

主呀! 希望Midby爸唔係比細菌入侵啦! 我好唔想佢食抗生素呀! 感謝主你比我地遇到個咁好既中醫, 咁有耐性去醫Midby爸!!!感謝主!!!