pump左11個月人奶既奶媽心聲

唔知仲會餵到幾耐人奶呢?

今日Midby就11個月大了! 我亦餵人奶11個月了。

到今日, 我仍然1日4-5次, 奶量已經少到係以前既一半。

係因為我用左ameda dual pump, 係就係pump 得快左好多, 不過唔係太清, 加上pump左咁耐, 已經鬆懈哂, 每次都唔係用好長時間。

以前at least 30 min, 而家15 min 之內搞掂, 加上又 M 來既關係, 已經慢慢少奶了。

我好多謝Midby爸既支持, 同埋佢既諒解。佢話, 餵到6個月已經達標了, 唔可以為左bb既健康而犧牲自己既健康。

對於人奶媽來講, 得到別人既支持, 特別o係最親既人係好重要。Midby未夠6個月時, 亦係我pump 奶最辛苦o個幾個月, 因為頭6個月 bb 要既奶量係最多, 我成日都想放棄, 言談間知道Midby爸好想我繼續, 老實講, 唔係我知道佢咁想我繼續, 我都未必會捱到頭6個月。

但我估唔到既係, 過左6個月後, Midby爸竟然無再比任何壓力我 (頭6個月都冇...只不過係我feel到佢好想我餵o者), 仲同我講, 要識得law個平衡。

作為支持母乳既媽媽, 以下呢番說話我應該唔好講出口, 因為會影響好多想餵母乳既人, 但係, 每樣事實都有利弊, 我地係唔係應該只聽哂佢好既一面, 而唔去衡量下佢既壞既一面呢?

母乳...大家有冇聽過佢有唔好既地方呢? 我地聽咁多講座, 睇咁多書, 咁多年個個都話母乳好, 但係佢真係無敵呢?

客觀咁講, 飲左11個月人奶既Midby, 佢照樣會病, 我唔覺得佢病得特別少。傷風發燒好似有兩次, 兩次都係發一日微燒唔洗食藥, 自己好番, 之後就第二日流鼻涕咳, 再過多日少鼻涕, 只有幾聲咳, 慢慢自己好。

另外無發燒既幾聲咳或流鼻水, 都有一兩次, 都係自己好番。

玫瑰疹1次, 發左6x個鐘燒之後就出疹, 出左一兩日少少紅疹就無事。

我有時諗, 係唔係因為Midby飲左人奶既關係, 次次都唔洗食藥, 自己1-2日就好番呢!

但有時我又會諗, 個個bb都係強壯既, 個個都好快好番架喇。有幾何見到bb 會病好耐架?

所以你問我bb係唔係強d, 我冇得比較, 答你唔到。

不過肯定既係, even Midby病時, 佢都係照樣玩得, 跳得, 走得。

不過, 聽講個個bb 病時都會照玩架喎!

雖然咁講, 我對母乳有一定既信心, 唔係我唔會餵到今日。

不過, 我個人經驗, 加上babykingdom都有幾位人奶媽分享過, 餵人奶係對媽媽本身既健康有影響。

我而家間中都會睇中醫, keep 個身體, 中醫都問我奶水點樣, 我話都唔係好多了, 佢就簡單講左句...唔係太多咪好, 唔好影響咁多身體。

當時唔明佢咩意思, 但睇左babykingdom 有d 媽媽既sharing, 加上自己好鐘意搵d papers 睇, 原來人奶呢樣野係好奇妙既! 唔多唔少真係會影響個媽媽。

我仲好記得我頭3個月, 每次PUMP完奶之後都會頭暈, 唔知係唔係我係pump, 比起bb食, d奶快出d, 定係我當時都叫做ok多奶, 定係咩原因, 總之就係每次pump完奶, 企起身, 總會有頭暈既感覺, 真係足足3個月, 我既身體去到5個月左右先叫做復原。

其實每一個奶媽所生產既人奶既營養都係大同小異, 都能夠滿足到bb所需既, 如果我食某一樣食物多d, 咁o個方面既營養o係奶內亦會多d, 不過除非個媽媽非常營養不良, 否則每個媽媽生產既人奶都係差唔多既。

咁樣亦即代表無論奶媽食幾多野, 定唔食好多野, 身體produce出來既人奶都係充滿營養, 咁樣...當個媽媽身體狀況唔係太好, 太忙, 休息又唔夠, 食又唔係食得太好時...身體為左要造奶, 就會用左本身媽媽體內既營養同埋脂肪, 所以d人話餵奶會令到媽媽瘦除左因為造奶要用卡路里之外, 有時係因為去用左媽媽本身既脂肪。

香港冇咩人會話o係生下一胎之前停左人奶, 休息幾個月先再懷孕, 但係我睇台灣某個官方網頁講人奶既, 佢地都話生下一胎之前, 要停左人奶最少係唔知半年定一年, 等身體復原先可以再懷孕。我覺得香港既醫護人員或者都會知道呢樣野, 不過為左唔想discourage大家去餵人奶, 當然唔會掛o係口邊, 提大家啦!

至於o係我地身份內law出來既脂肪, 其實係一d 毒素比較高既脂肪來。我睇過有報導話HK定內地既奶媽既奶含唔知咩野有害物質非常高。睇完唔係幾開心, 覺得我地辛辛苦苦去pump 奶, 原來自己既奶都唔係咁好quality。

原來我地成日食埋d 深海魚, 海產, 當中好多heavy metal, 好似mercury, lead, 會令到人奶中呢d有害物質上升, bb飲左我地既奶, 咪即係食埋呢d有害物質囉。

呢樣野我覺得好有根據。我o係Midby滿月之後冇幾耐, 健康院姑娘叫我幫幫手, 協助中大做個研究, 就係pump3安奶比佢law番去化驗下我地人奶內有幾多有機化學物質。我同collect sample既姐姐傾左一陣, 佢話如果媽媽既diet (餵奶之前幾個月食既都計數)多魚類呀, 牛肉呀, 等等, 我地奶內既某d物質都會高d。

個research results 會o係今年6月announce, 希望我o個d quality 唔好太差啦!

另外如果個媽媽食得唔夠既, 身體就會用左我地體內既儲存既脂肪去造奶。我發覺我o係Midby6個月開始我瘦得快左, 可能自己pump左6個月喇, 又唔係成日得閒食好多野, 加上Midby大個喇, d奶要多d脂肪, 所以我身體內既脂肪就law左去做奶。

呢樣係唔好事來, 因為我地儲蓄咁耐既脂肪毒素好高, 比左bb飲, 都唔係好事。

有時諗, 飲有機既牛奶會唔會好d呢? 我地食既野唔可以完全有機, 我地造既奶都會有離質, 咁飲有機牛奶得唔得呢?

我好矛盾! 我而家只係pump到4xxml, 只係夠bb飲兩餐, 另外一餐會係羊奶。好多人話牛奶好易令bb敏感, 但我又覺得如果bb唔係日日飲好多, 佢既腸胃應該afford到, 再加上揀有機既, 應該唔錯。況且, 以牛奶為主既小朋友, 包括我地身邊幾多幾多人, 咁多年都一樣好好, 好ok呀! 如果牛奶真係咁壞, 點解仲係majority既bb同埋adults 都係飲牛奶呢? 但係我又擔心, 牛奶其實真係唔係太好, 所以我最後揀左比Midby飲羊奶。

但係又有兒科醫生話羊奶唔夠葉酸, 我去compare過有機羊奶同有機牛奶, 見到佢好多成份都唔及牛奶咁多。我又會諗, 牛奶係唔係營養好d呢?

我又compare過有機奶粉同非有機既比較, 有機既冇d DHA, choline呀, 等等被稱為對bb 發育好重要既成份, 即是說, 揀有機, 為左bb健康著想；揀非有機既, 就有添加, 而家個個bb都會飲架喇, 自己bb唔飲, 會唔會唔夠人地bb咁smart呢?

有人話, 奶粉加入左呢d成份冇用既, 但係我地呢一代同bb呢一代比, 真係一代叻過一代。以前既bb 12個月識行, 已經叻, 而家我d 朋友好多都係bb10個月就識行了。

以前bb 8-9個月先出1st 牙, Midby4個幾月就出1st隻牙, 而家連大牙都出埋, 11個月, 有9隻牙。

你話營養同bb既發育係唔係好有直接關係呀!

所以, 結論係:
1) 餵人奶用奶媽既休息時間, 體力, 營養, 真係要量力而為, 唔好為左身邊既人既壓力而去餵。
2) 作為支持你身邊餵奶既人, 唔好比壓力佢, 好多時人奶媽包括我在內繼續餵係因為受到身邊既人既壓力而咁做。
3) 餵得人奶就要食得好, 休息得好, 我地唔係以前既女人唔洗番工, 我地仲要晚睡早起, 真係要比身體抖下!
4) 餵人奶預左o係餵奶o個幾個月要半夜pump milk, 冇左私人時間好free咁放工留底個bb比屋企人, 自己四周圍去, 又唔可以同老公去旅行, 不過呢種生活係會過去既!
5) 食得要小心, 深海魚唔好亂咁食, 三文魚而家都好多澈素喇, 反而食得清淡, 食多d 新鮮野仲好。
6) 呢個好重要: 唔夠奶就算喇, 最多食多d米飯等多d energy去造奶。我地要respect我地既身體, 如果身體ok既, 佢自然會幫我地造奶, 我曾經有陣子好癩咁勁食增奶食物, 但係都係短暫性有效既, 唔食一樣會drop番。如果一個人食得多, 休息多就會多奶, 唔多奶就係因為唔夠休息同埋身體狀況唔太好, 夾硬食多奶丸令到自己多奶我唔贊成 (雖然我都有陣子好想好想食), 咁樣咪即係 = 好累要訓覺, 但我地唔訓, 去飲coffee去頂住一樣。
7) 人奶同animal 既奶係就係有分別, 分別係大得好緊要呢? animal protein 唔係毒藥, 人奶媽儘力喇, 唔夠奶咪加牛/羊奶, 我地揀人奶都係想比多d抗體bb o者!牛/羊奶都有, 只不過冇咁多乍嘛, 佢地一樣有佢地既價值, 我大把朋友既bb飲奶粉都係一樣好ok!

雖然我識咁講, 不過我都想儘我能力, 繼續餵人奶。如果我屋企冇姐姐幫手, 我絕對唔會可以餵到今時今日!

路過既媽媽: 儘力就算喇, bb 仲有漫漫長路, 頭6個月有我地既人奶同佢打好根基已經好好了, 日後好多野都要靠bb本身架!