35w6d 頭都大哂

研究緊有冇必要催生的一天

由細到大, 亞媽都話催生好痛。我都知, 因為子宮頸都未ready開, 你就塞粒藥入去, 叫佢打開佢, 咁唔自然既方法 (我明白好多時係無可避免), 緊係唔係太好啦。我亞媽就係用呢個方法生我細佬, 佢到今時今日成30年都成日掛o係口邊話點樣點樣痛。

我之前冇諗過我要催生。不過近排亞May打比我, 同我講佢個bb女過左EDD都冇動靜, 所以入左廣華催生, 佢痛足18個鐘, 點樣點樣辛苦, etc。我當時仲可以好輕鬆去聽佢個故仔, 完全都冇諗過我會有呢一日既機會...但...

尋日, 上網睇睇下info知道BB既頭圍32cm已經叫大了, Midby既頭圍o係34w時已經32cm幾 -- 2 weeks ahead, 佢而家接近36w喇, 即係佢仲有機會, 好大機會繼續大下去, 咁樣我作動時, 子宮頸開唔夠, or 盤骨唔夠闊點好呢? 我唔想好似Esther咁生唔到, 要緊急開刀, 所以我搵左d 資料, 知道有d 醫生會建議媽媽早d 生, 等bb 未發育得太大隻時就已經出世。

我直覺覺得Dr Wong 唔會建議我咁做, 佢好似都好+ve 對於Midby既頭仔大個人。佢只係hint話出世時要用野幫一幫 (我估佢指用instrument, 好似吸出來, or 夾出來)。如果可以比我順產, 而只係要用吸盤/ 夾, 我會接受到, 但我真係接受唔到要我緊急開刀。

我會o係下個星期去見Dr Wong。或者唔等夠2weeks先見佢, 因為都已經夠左36w 了, 應該要見得密d, 所以我會早小小, 星期二啦, 去見佢, 早d 傾完, 同佢有左共識, 我會安心d。

時間過得好快, 仲記得32w時仲係覺得距離出世有一段時間, 而家話咁快就來喇, 上網搵左d info, 都見到有d 開心, 就係有research support 既係胎兒頭大同智力高有關 (不過好多好多info 都話係冇關, 仲話太大係有可能腦積水或生瘤tim)。 http://blog.yam.com/cucushnwind/article/3865023

為左Midby既來臨, 我今日又食番yougurt喇, 希望我既產道多d 益生菌, 令到佢經過時黏到d, 對佢腸胃有好處啦。

另外我都開始食左涼野同埋去濕野, 好似:
1) 腐竹白果糖水 x 2 次 (有人話唔好食白果, 怕有毒, 但我已食左2-3次了, 最多下次唔落囉)
2) 土伏岺去濕湯 x 2 次
3) 竹蔗水 x 2次
4) 芝麻糊 x 數次
5) 西瓜 x 數次 (buffet 時食, 食左3-4次左右, 每次5舊左右啦)
6) 梨 x 至少6隻
7) 白果豬肚湯 x 1 次
8) 扁豆鰂魚湯 x 好多次喇 (o係7個月時開始就飲扁豆, 去濕嘛)
9) 馬蹄露 x 1 次
10) 粉葛扁豆小豆湯 x 1次 (36w時, 即係今晚開始飲)
11) 清保涼 x 1次 (35w幾時飲過一次, 唔落杞子, 圓肉, 意米同埋茨實)
12) 間唔中都會飲下焗羅漢果菊花水

將呢幾個月飲過既湯水打番出來, 又好似好多, 但總係覺得唔夠, 成日都叫亞媽再整d。不過飲埋白蓮鬚我估都夠喇掛?

希望下個星期二見Dr Wong時有好消息啦!

Midby: 你要同媽媽一齊努力呀! 我呢兩日都feel 到你好努力o係媽媽下面 (係唔係盤骨位呀?) 郁下郁下, 媽媽行咁多, 同埋行樓梯都係想你個頭仔落d 乍, 你要同我配合, 媽媽唔想"催"你出世, 想你自然鐘意幾時出就幾時出, 但係你都要同我配合先可以架嘛!